പൃഥ്വിരാജിനെ നായകനാക്കി രാജസേനന്‍ സംവിധാനം ചെയ്ത ചിത്രമായിരുന്നു നക്ഷത്ര കണ്ണുള്ള രാജകുമാരന്‍ അവനുണ്ടൊരു രാജകുമാരി. പൃഥ്വിരാജിന്റെ ആദ്യ ചിത്രം കൂടിയായിരുന്നു ഇത്. ചിത്രത്തില്‍ നായികയായെത്തിയത് പ്രശസ്ത കൊറിയോഗ്രാഫര്‍ രഘുറാമിന്റെ മകള്‍ ഗായത്രിയായിരുന്നു. ഇപ്പോഴിതാ തന്റെ വിവാഹമോചനത്തെ കുറിച്ച് മനസ് തുറക്കുകയാണ് താരം.
23ാം മൂന്നാം വയസിലാണ് വിവാഹമോചിതയായതെന്ന് ഗായത്രി പറയുന്നു. വിവാഹം തന്റെ ജീവിതത്തിലെ ചെറിയൊരു കാലയളവ് മാത്രമാണ്. അറേഞ്ച്ഡ് മാര്യേജ് ആയിരുന്നു. അതുകൊണ്ട് പരസ്പരം മനസിലാക്കാന്‍ സാധിച്ചിട്ടില്ല. ഇപ്പോള്‍ അദ്ദേഹം എവിടെയാണെന്നും എന്ത് ചെയ്യുന്നെന്നും തനിക്ക് അറിയില്ല. വിവാഹ മോചനത്തിന് ശേഷം ഒരു വിവരവും ഇല്ല. ചിലപ്പോള്‍ അദ്ദേഹം മറ്റൊരാളെ വിവാഹം ചെയ്യുകയും മക്കളൊക്കെയായി ഒരു കുടുംബ ജീവിതം നയിക്കുകയും ആയിരിക്കാമെന്നും ഗായത്രി പറഞ്ഞു.
മുപ്പത് വയസുവരെയൊക്കെ ആര്‍ഭാട ജീവിതത്തോട് ഭ്രമം ഉണ്ടായിരുന്നു. എന്നാല്‍ ഇപ്പോള്‍ സിംപിള്‍ ലൈഫ് ആണ് ഇഷ്ടം. ചെറുപ്പത്തില്‍ തന്നെ നേരിടേണ്ടത് എല്ലാം നേരിട്ടിട്ടുള്ള പരിചയം ആയത് കൊണ്ടാവും ഇപ്പോള്‍ തനിക്ക് എല്ലാം ശീലമാണെന്നും ഗായത്രി പറഞ്ഞു
ചാര്‍ലി ചാപ്ലിന്‍ എന്ന സിനിമയിലൂടെയാണ് ഗായത്രി അഭിനയ രംഗത്തേക്കുവന്നത്. പ്രഭുദേവയായിരുന്നു ചിത്രത്തിലെ നായകന്‍. തുടര്‍ന്ന് തമിഴ് സിനിമകളില്‍ സജീവമായെങ്കിലും വിവാഹത്തെ തുടര്‍ന്ന് സിനിമ വിട്ടു. വിവാഹ ബന്ധം വേര്‍പെടുത്തിയ ശേഷം വീണ്ടും സിനിമയിലേക്ക് മടങ്ങിയെങ്കിലും അമ്മ വേഷങ്ങളായിരുന്നു ഗായത്രിയെ തേടിയെത്തിയത്. തുടര്‍ന്ന് എന്നന്നേക്കുമായി അഭിനയം വേണ്ടെന്നുവയ്ക്കുകയായിരുന്നു.
