കുംകി എന്ന ചിത്രത്തിലൂടെ അഭിനയരംഗത്തേക്ക് കടന്ന് വന്ന നടിയാണ് ലക്ഷ്മി മേനോൻ. സുന്ദരപാണ്ഡ്യൻ, പാണ്ടിയനാട്, കൊമ്പൻ തുടങ്ങിയ ചിത്രങ്ങളിലും അഭിനയിച്ചിട്ടുള്ള ലക്ഷ്മി മേനോൻ ദിലീപിന്റെ നായികയായി മലയാളത്തിലും അഭിനയിച്ചിട്ടുണ്ട്. തല അജിത്തിന്റെ അനിയത്തിയായി അഭിനയിച്ച വേതാളവും ഹിറ്റായിരുന്നു. ഒരു ഗായിക കൂടിയായ ലക്ഷ്മി മേനോൻ ആലപിച്ച ഒരു ഊർല രണ്ട് രാജാ എന്ന ചിത്രത്തിലെ കുക്കുറു സോങ്ങ് ഹിറ്റായിരുന്നു. അഭിനയത്തിനും സംഗീതത്തിനും പുറമേ നല്ലൊരു നർത്തകി കൂടിയാണ് ലക്ഷ്മി.
കമലഹാസൻ അവതാരകനായ തമിഴ് ബിഗ് ബോസ്സിന്റെ നാലാം സീസണിൽ ലക്ഷ്മിയും ഉണ്ടാകുമെന്ന് റിപ്പോർട്ടുകൾ പുറത്ത് വന്നിരുന്നു. ആ വാർത്തകൾ നിരാകരിച്ചുകൊണ്ട് താരം ഇട്ട ഇൻസ്റ്റാഗ്രാം സ്റ്റോറി ശ്രദ്ധ പിടിച്ചു പറ്റിയിരിക്കുകയാണ്. ലക്ഷ്മി മേനോന്റെ ഇൻസ്റ്റാഗ്രാം സ്റ്റോറി ഇപ്രകാരമാണ്.
‘ബിഗ് ബോസ് ഷോയിൽ ഞാൻ പങ്കെടുക്കുന്നില്ല. മറ്റുള്ളവരുടെ ടോയ്‌ലെറ്റ് കഴുകാനോ പാത്രം കഴുകാനോ ഞാൻ ഇപ്പോഴെന്നല്ല ഒരിക്കലും പോകുന്നില്ല. അതോടൊപ്പം തന്നെ ഒരു ഷോയുടെ പേരിൽ ക്യാമറയുടെ മുൻപിൽ കിടന്ന് അടി കൂടുവാനും എന്നെ കിട്ടില്ല. ഏതെങ്കിലും തരം താഴ്ന്ന ഷോയിൽ ഞാൻ പങ്കെടുക്കുന്നുവെന്ന ഊഹാപോഹങ്ങളുമായി ഇനിയും ആരും വരില്ലെന്ന് ഞാൻ പ്രതീക്ഷിക്കുന്നു.
ഈ ഒരു ഇൻസ്റ്റാഗ്രാം സ്റ്റോറിക്ക് പിന്നാലെ നിരവധി മോശം കമന്റുകളും മെസ്സേജുകളുമാണ് താരത്തിന് സോഷ്യൽ മീഡിയയിൽ ലഭിച്ചത്. അതിനോടും ലക്ഷ്മി പ്രതികരിച്ചിട്ടുണ്ട്.
എന്റെ സ്റ്റോറി കണ്ട് നിരവധി പേരാണ് എനിക്ക് നെഗറ്റീവ് മെസ്സേജുകൾ അയച്ചത്. എന്നെ ചോദ്യം ചെയ്യാൻ നിങ്ങൾ ആരുമല്ലെന്ന് ഞാൻ ഓർമപ്പെടുത്തിക്കൊള്ളുന്നു. ഒരു അഭിപ്രായം പറയാനും തീരുമാനം എടുക്കുവാനും എനിക്ക് അവകാശമുണ്ട്. ചിലർക്ക് ഷോ ഇഷ്ടമായിരിക്കും, ചിലർക്ക് ഇഷ്ടമല്ലായിരിക്കും. പല കാരണങ്ങൾ കൊണ്ടും എനിക്ക് ആ ഷോ ഇഷ്ടമല്ല. എന്റെ വീട്ടിൽ ഞാൻ തന്നെയാണ് എന്റെ പാത്രങ്ങൾ കഴുകുന്നതും എന്റെ ടോയ്‌ലറ്റ് കഴുകുന്നതും. അത് ഒരു ക്യാമറക്ക് മുന്നിൽ കാണിക്കുവാൻ ഞാൻ ഇഷ്ടപ്പെടുന്നില്ല.
ബിഗ് ബോസ് ഷോയെ കുറിച്ച് പരാമർശിച്ചതിന് പിന്നാലെ എനിക്ക് നിരവധി നെഗറ്റീവ് കമന്റുകളാണ് ലഭിച്ചത്. ഇത് ആരെയും വേദനിപ്പിക്കുവാനോ ഒരു ഷോയെ കുറിച്ച് സംസാരിച്ച് പ്രശ്നമുണ്ടാക്കുവാനോ അല്ല. മറിച്ച് എനിക്ക് വേണ്ടി ഞാൻ തന്നെ സംസാരിക്കുവാനാണ്. കൂടാതെ ഷോയിൽ ഞാൻ പങ്കെടുക്കുന്നുണ്ടോ ഇല്ലായെന്നോ ഉള്ളതിന് വ്യക്തമായ ഒരു ഉത്തരവും നൽകുവാനാണ്‌. എന്നെ പിന്തുണച്ചതിനും പിന്തുണക്കാതിരുന്നതിനും നന്ദി.
