മമ്മൂട്ടി-അമല്‍ നീരദ് ഒന്നിക്കുന്ന ഭീഷ്മപര്‍വ്വം പ്രേക്ഷകര്‍ ആവേശത്തോടെയാണ് കാത്തിരിക്കുന്നത്. ചിത്രത്തിന്റെ ടീസറിന് മികച്ച പ്രതികരണമാണ് ലഭിച്ചത്. പതിനഞ്ച് വര്‍ഷത്തിന് ശേഷം മമ്മൂട്ടിയും അമല്‍ നീരദും ഒന്നിക്കുന്നുവെന്ന പ്രത്യേകതയും ചിത്രത്തിനുണ്ട്. മാര്‍ച്ച് മൂന്നിനാണ് ചിത്രം തീയറ്ററുകളിലെത്തുക.
ഇപ്പോഴിതാ ചിത്രത്തില്‍ പ്രധാനകഥാപാത്രത്തെ അവതരിപ്പിച്ച നടി മാലാ പാര്‍വതി പറഞ്ഞിരിക്കുന്നതാണ് ശ്രദ്ധേയമായിരിക്കുന്നത്. ചിത്രം ഒരു മെഗാ മാസ് വിസ്‌ഫോടനമായിരിക്കുമെന്നാണ് മാലാ പാര്‍വതി പറഞ്ഞത്. തീയറ്ററില്‍ ബ്ലാസ്റ്റ് ആയിരിക്കും ഭീഷ്മപര്‍വ്വം ഉണ്ടാക്കുകയെന്നും അവര്‍ പറഞ്ഞു. ചിത്രത്തില്‍ മോളി എന്ന കഥാപാത്രത്തെയാണ് താന്‍ അവതരിപ്പിക്കുന്നത്. നെഗറ്റീവ് ടച്ചുള്ള മുഴുനീള കഥാപാത്രമാണ് മോളി. കുമ്പളങ്ങി സ്ലാങ്ങിലാണ് ചിത്രത്തില്‍ സംസാരിക്കുന്നതെന്നും മാലാ പാര്‍വതി കൂട്ടിച്ചേര്‍ത്തു.
അമല്‍ നീരദും ദേവദത്ത് ഷാജിയും ചേര്‍ന്നാണ് ഭീഷ്മപര്‍വ്വത്തിന്റെ തിരക്കഥ ഒരുക്കിയിരിക്കുന്നത്. റാണി പദ്മിനിയുടെ സഹരചയിതാവ് കൂടിയായ പി.ടി.രവിശങ്കറാണ് അഡീഷണല്‍ സ്‌ക്രീന്‍പ്ലേ. ആനന്ദ് സി ചന്ദ്രനാണ് അമല്‍ നീരദ് ചിത്രത്തിനായി ക്യാമറ ചലിപ്പിക്കുന്നത്. ബിലാല്‍ ചിത്രീകരിക്കാനിരുന്നതും ആനന്ദ് സി.ചന്ദ്രന്‍ ആയിരുന്നു. വിവേക് ഹര്‍ഷന്‍ എഡിറ്റിംഗും സുഷിന്‍ ശ്യാം സംഗീതവും നിര്‍വഹിച്ചിരിക്കുന്നു. ചിത്രത്തില്‍ മൈക്കിള്‍ എന്നാണ് മമ്മൂട്ടി അവതരിപ്പിക്കുന്ന കഥാപാത്രത്തിന്റെ പേര്. മമ്മൂട്ടിക്കൊപ്പം നദിയാ മൊയ്തു, സൗബിന്‍ ഷാഹിര്‍, ശ്രീനാഥ് ഭാസി, ഷൈന്‍ ടോം ചാക്കോ, ലെന തുടങ്ങി വന്‍ താരനിരയാണ് ചിത്രത്തിലുള്ളത്.
