മലയാളത്തിന്റെ പ്രിയ താരമാണ് മഞ്ജു വാര്യര്‍. നീണ്ട ഇടവേളയ്ക്ക് ശേഷം മലയാള സിനിമയില്‍ തിരിച്ചെത്തിയ താരം മലയാളത്തിന് പുറമേ തമിഴിലും തിരക്കിട്ട താരമായി. തമിഴില്‍ അജിത്ത് നായകനായി എത്തിയ തുനിവാണ് മഞ്ജുവിന്റേതായി ഒടുവില്‍ പുറത്തിറങ്ങിയ ചിത്രം. ഇപ്പോഴിതാ ബൈക്കില്‍ യാത്ര ചെയ്യണമെന്ന തന്റെ ആഗ്രഹം സഫലമാക്കാന്‍ ലൈസന്‍സ് സ്വന്തമാക്കിയിരിക്കുകയാണ് താരം.
എറണാകുളം കാക്കനാട് ആര്‍ടി ഓഫീസിനു കീഴിലായിരുന്നു താരം ടെസ്റ്റിന് പങ്കെടുത്തത്. തല അജിത്തിനൊപ്പം ബൈക്ക് യാത്രയ്ക്ക് പോയതിനു ശേഷം തനിക്കും സ്വന്തമായി ബൈക്ക് ഓടിക്കണം എന്ന് മഞ്ജു വാര്യര്‍ ഇന്റര്‍വ്യൂകളില്‍ പറയുകയുണ്ടായി. അതിന്റെ ആദ്യപടി എന്നോണമാണ് താരം ലൈസന്‍സ് സ്വന്തമാക്കിയത്. ടെസ്റ്റ് ഗ്രൗണ്ടില്‍ നിന്ന് ആര്‍.ടി ഓഫീസര്‍മാര്‍ക്കൊപ്പം പകര്‍ത്തിയ താരത്തിന്റെ ചിത്രങ്ങള്‍ വൈറലാണ്.
ആയിഷയാണ് ഇനി മഞ്ജുവിന്റേതായി പുറത്തിറങ്ങാനുള്ള ചിത്രം. നവാഗതനായ ആമിര്‍ പള്ളിക്കല്‍ ആണ് ചിത്രം സംവിധാനം ചെയ്തിരിക്കുന്നത്. നീണ്ട ഇടവേളയ്ക്ക് ശേഷം റാസല്‍ ഖൈമയില്‍ ചിത്രീകരിക്കുന്ന മലയാള ചിത്രമാണ് ആയിഷ. ചിത്രത്തിന്റെ രചന ആഷിഫ് കക്കോടിയാണ് നിര്‍വഹിച്ചിരിക്കുന്നത്. ജനുവരി ഇരുപതിന് ചിത്രം തീയറ്ററുകളില്‍ എത്തും.
