‘ലുലുമാളിൽ വെച്ച് ഒരു അപ്പാപ്പൻ തുറിച്ചു നോക്കി, അടുത്തു ചെന്നിട്ട് എന്താ ചേട്ടാ എന്ന് ചോദിച്ചു’; മറുപടി കേട്ട് താൻ ഉരുകിപ്പോയെന്ന് മീനാക്ഷി

റിയാലിറ്റി ഷോയിലൂടെയും പിന്നീട് അവതാരകയായും നടിയായും പ്രേക്ഷകരുടെ പ്രിയങ്കരിയായ താരമാണ് മീനാക്ഷി രവീന്ദ്രൻ. നായികാനായകൻ എന്ന പരിപാടിയിലൂടെ എത്തിയ മീനാക്ഷി ഇപ്പോൾ ‘ഉടൻ പണം’ പരിപാടിയുടെ അവതാരകയാണ്. ഡെയിൻ ഡേവിസും മീനാക്ഷിയും ചേർന്നാണ് ഈ പരിപാടി അവതരിപ്പിക്കുന്നത്. മാലിക് സിനിമയിൽ ഫഹദ് ഫാസിൽ അവതരിപ്പിച്ച കഥാപാത്രത്തിന്റെ മകളായിട്ട് അഭിനയിച്ച മീനാക്ഷി ഹൃദയം സിനിമയിലും ഒരു ചെറിയ വേഷത്തിൽ എത്തിയിരുന്നു.

പുറത്തേക്ക് ഇറങ്ങുമ്പോൾ ആളുകൾ തന്നെ തിരിച്ചറിയുന്നുണ്ടെന്നും എന്നാൽ അത് താനിപ്പോഴും ഉൾക്കൊണ്ടിട്ടില്ലെന്നും പല അഭിമുഖങ്ങളിലും മീനാക്ഷി പറഞ്ഞിട്ടുണ്ട്. അത്തരത്തിൽ ഒരു അനുഭവമാണ് മീനാക്ഷി കഴിഞ്ഞയിടെ ഒരു അഭിമുഖത്തിൽ പറഞ്ഞത്. ലുലു മാളിൽ പോയപ്പോൾ ആയിരുന്നു സംഭവം. ഒരു അപ്പാപ്പൻ തന്നെ കുറേ നേരമായി തുറിച്ചു നോക്കിക്കൊണ്ടിരിക്കുന്നു. ഇത് തന്നെ വല്ലാതെ ബുദ്ധിമുട്ടിലാക്കി. താൻ അപ്പാപ്പന്റെ അടുത്ത് ചെന്നിട്ട് ‘എന്താ ചേട്ടാ’ എന്ന് ചോദിച്ചു. അപ്പോൾ ആ അപ്പാപ്പൻ, ‘മീനാക്ഷി അല്ലേ’ എന്നായിരുന്നു മറുപടിയായി ചോദിച്ചത്. അതുകേട്ട് താൻ വല്ലാതെ ഉരുകിപ്പോയെന്നും മീനാക്ഷി പറഞ്ഞു. പുറത്തിറങ്ങുമ്പോൾ തന്നെ ആളുകൾ തിരിച്ചറിയുമെന്നത് തനിക്ക് ഉൾക്കൊള്ളാൻ ആയിട്ടില്ലെന്നും മീനാക്ഷി പറഞ്ഞു.

ഇരുപത്തിരണ്ടാം വയസിലാണ് ജോലി രാജിവെച്ച് അഭിനയത്തിലേക്ക് മീനാക്ഷി എത്തിയത്. അഭിനയവും അവതാരകജോലിയും ഒക്കെയായി തിരക്കിലാണ് ഇപ്പോൾ മീനാക്ഷി. സ്കൈ എന്ന പേരുള്ള ഒരു പട്ടിക്കുട്ടിയും ഇപ്പോൾ മീനാക്ഷിക്ക് സ്വന്തമായിട്ടുണ്ട്. കഴിഞ്ഞ പിറന്നാളിന് സുഹൃത്തും സഹ അവതാരകനുമായ ഡെയിൻ ഡേവിസ് ആണ് പട്ടിക്കുട്ടിയെ സമ്മാനമായി നൽകിയത്. ആളുകൾ തന്നെപ്പറ്റി എന്ത് പറയുന്നു എന്നത് തനിക്ക് ഒരു വിഷയമല്ലെന്നും താൻ തന്റെ ഇഷ്ടത്തിനാണ് ജീവിക്കുന്നതെന്നും മീനാക്ഷി വ്യക്തമാക്കി.