ആറ് വര്‍ഷത്തെ ഇടവേളയ്ക്ക് ശേഷം സിനിമയിലേക്ക് തിരിച്ചെത്തിയിരിക്കുകയാണ് മീരാ ജാസ്മിന്‍. സത്യന്‍ അന്തിക്കാട് സംവിധാനം ചെയ്ത മകള്‍ എന്ന ചിത്രത്തിലൂടെയാണ് മീരാ ജാസ്മിന്‍ സിനിമയില്‍ വീണ്ടും സജീവമാകാന്‍ ഒരുങ്ങുന്നത്. ജയറാമാണ് ചിത്രത്തില്‍ മീരയുടെ നായകന്‍. ഇപ്പോഴിതാ തിരിച്ചുവരവിനെകുറിച്ച് പറയുകയാണ് മീരാ ജാസ്മിന്‍. രേഖ മേനോന് നല്‍കിയ അഭിമുഖത്തിലാണ് മീര മനസ് തുറന്നത്.
നൂറ് ശതമാനം ചെയ്യണമെന്ന് തോന്നിയാല്‍ മാത്രമേ അടുത്ത സിനിമ ചെയ്യുകയുള്ളൂ എന്ന് മീര പറയുന്നു. പുതിയ സംവിധായകര്‍ക്കൊപ്പം പ്രവര്‍ത്തിക്കണമെന്ന് ആഗ്രഹമുണ്ട്. പുതുതലമുറയില്‍ ഫഹദിനൊപ്പം അഭിനയിക്കണമെന്നുണ്ടെന്നും മീര പറയുന്നു.
ദൈവം തനിക്ക് നല്ല ആയുസ് നല്‍കിയാല്‍ 80-90 വയസുവരെ അഭിനയിക്കും. വേറെ എവിടെയും പോകണമെന്നില്ല. നിരവധി പേര്‍ കഥകളുമായി സമീപിക്കുന്നുണ്ട്. പറ്റുമെന്ന് തോന്നുകയാണെങ്കില്‍ മാത്രമേ ചെയ്യുകയുള്ളൂ എന്നും മീര പറഞ്ഞു. നവ്യ നായരുടെ തിരിച്ചുവരവ് തനിക്ക് വളരെയധികം സര്‍പ്രൈസായെന്നും മീര ജാസ്മിന്‍ പറഞ്ഞു. മഞ്ജു ചേച്ചി ഇപ്പോള്‍ സിനിമയില്‍ സജീവമാണ്. ഭാവന തിരിച്ചുവരവിനൊരുങ്ങുകയാണ്. ഇതൊക്കെ സന്തോഷം നല്‍കുന്നതാണെന്നും മീര ജാസ്മിന്‍ കൂട്ടിച്ചേര്‍ത്തു.
