സൂത്രധാരൻ എന്ന സിനിമയിലൂടെ ചലച്ചിത്രലോകത്തേക്ക് എത്തിയ താരമായിരുന്നു മീര ജാസ്മിൻ. പിന്നീട് നിരവധി ചിത്രങ്ങളിലൂടെ മലയാളികളുടെ പ്രിയങ്കരിയായി മാറിയ നടിയാണ് താരം. ‘പാഠം ഒന്ന് ഒരു വിലാപം’ എന്ന സിനിമയിലെ അഭിനയത്തിന് മീര ജാസ്മിന് മികച്ച നടിക്കുള്ള ദേശീയപുരസ്കാരം ലഭിക്കുകയുണ്ടായി. വിവാഹത്തോടെ സിനിമയിൽ നിന്ന് ഇടവേള എടുത്ത താരം വീണ്ടും സിനിമയിലേക്ക് തിരികെ എത്തിയിരിക്കുകയാണ്. സത്യൻ അന്തിക്കാട് സംവിധാനം ചെയ്യുന്ന ‘മകൾ’ എന്ന ചിത്രത്തിലൂടെ തിരിച്ചുവരവിന് ഒരുങ്ങുകയാണ് മീര ജാസ്മിൻ. ചിത്രത്തിൽ ജയറാമാണ് നായകനായി എത്തുന്നത്.
‘2020ൽ കോവിഡ് തുടങ്ങിയ സമയത്താണ് സത്യൻ അങ്കിൾ പ്രൊജക്ട് വിളിച്ചുപറഞ്ഞത്. അച്ചുവിന്റെ അമ്മ, രസതന്ത്രം എന്നീ കുടുംബചിത്രങ്ങൾ എനിക്ക് തന്നയാളാണ്. ലൈഫിൽ പ്രധാനപ്പെട്ട സമയങ്ങളിലാണ് അദ്ദേഹത്തിന്റെ പടം ചെയ്തിട്ടുള്ളത്. കുടുംബത്തിലെ ഒരാളെ പോലെയാണ് അദ്ദേഹം എനിക്ക്. അതുകൊണ്ടു തന്നെ വളരെ സ്നേഹവും നന്ദിയും അദ്ദേഹത്തോട് ഉണ്ട്’ – മീര ജാസ്മിൻ പറഞ്ഞു. ചെറുപ്പത്തിലേ കരിയർ തുടങ്ങിയതിനാൽ കുറേ അനുഭവങ്ങളും തിരിച്ചറിവുകളുമുണ്ടായെന്നും മീര ജാസ്മിൻ പറഞ്ഞു. സന്തോഷവും മനസമാധാനവും ആണ് ജീവിതത്തിൽ ഏറ്റവും വലുതെന്ന് ഞാൻ വിശ്വസിക്കുന്നു. തുടരെ തുടരെ സിനിമ ചെയ്തു കൊണ്ടിരുന്നപ്പോള്‍ എനിക്ക് വേണ്ടി ഒരു സമയമില്ലായിരുന്നെന്നും ഒരു സിനിമ കഴിഞ്ഞ് അടുത്ത സിനിമയിലേക്ക് പോയിക്കൊണ്ടിരുന്നത് അത്ര നല്ലതല്ലായിരുന്നെന്നും മീര പറഞ്ഞു.
വിവാഹിതയായതോടെ അത് നല്ല രീതിയിൽ ഉപയോഗിക്കാൻ തീരുമാനിക്കുകയായിരുന്നു. കുക്കിങ്ങ്, ബിസിനസ് ഒക്കെ പഠിച്ചു. നേരത്തെ തനിക്ക് ആരുടെയും പിന്തുണയില്ലാതെ പറ്റില്ലായിരുന്നെന്നും വിനോദയാത്രയിലെ ഡയലോഗ് പോലെ, അന്ന് ഒരു കിലോ അരിക്ക് എത്രയായിരുന്നു വിലയെന്ന് ശരിക്കും തനിക്ക് അറിയില്ലായിരുന്നെന്നും മീര പറഞ്ഞു. അന്നൊരു ബബിളിനകത്ത് ആയിരുന്നെന്നും എന്നാൽ ഇപ്പോൾ ലോകം കണ്ടെന്നും താരം വ്യക്തമാക്കി. സിനിമയില്‍ നിന്നും മാറി നിന്ന കാലത്ത് തനിക്ക് മിസ് ചെയ്തിരുന്നുവെന്നും മീര വ്യക്തമാക്കി.
