ആരാധകരും ഇന്ത്യൻ സിനിമാ ലോകവും ഒരുപോലെ കാത്തിരുന്ന വിവാഹം ആയിരുന്നു നയൻതാര – വിഘ്നേഷ് ശിവൻ വിവാഹം. അത്യാഢംബരത്തോടെയാണ് വിവാഹം ചെന്നൈയിൽ നടന്നത്. അടുത്ത ബന്ധുക്കളും സുഹൃത്തുക്കളും സിനിമാലോകത്തെ പ്രമുഖരും ഉൾപ്പെടെ വളരെ കുറച്ചുപേർ മാത്രമാണ് വിവാഹച്ചടങ്ങിൽ പങ്കെടുത്തത്. എല്ലാവരുടെയും ആശിർവാദത്തോടെയും അനുഗ്രഹത്തോടെയുമാണ് വിഘ്നേഷ് നയൻതാരയെ താലിചാർത്തിയത്.
വിവാഹവുമായി ബന്ധപ്പെട്ട ചെറിയ കാര്യങ്ങൾ പോലും അറിയാൻ ആരാധകർ കൗതുകത്തോടെയാണ് കാത്തിരിക്കുന്നത്. ചെന്നൈ മഹാബലിപുരത്തുള്ള ഷെറാട്ടൺ ഗ്രാൻഡ് ഹോട്ടലിൽ വെച്ചായിരുന്നു നയൻതാരയും വിഘ്നേഷ് ശിവനുമായുള്ള വിവാഹം. നടൻ രജനികാന്ത്, ഷാരുഖ് ഖാൻ ഉൾപ്പെടെ സിനിമാരംഗത്ത് നിന്നുള്ള നിരവധി പ്രമുഖർ വിവാഹച്ചടങ്ങുകൾക്ക് സാക്ഷ്യം വഹിക്കാൻ എത്തിയിരുന്നു. വിക്കിയുടെ കുടുംബത്തിലെ പുതിയ അംഗമായി മാറിയ നയൻതാര വിക്കിയുടെ ബന്ധുക്കൾക്ക് വിലപിടിപ്പുള്ള സമ്മാനങ്ങൾ നൽകിയാണ് ആ കുടുംബത്തിലേക്ക് പ്രവേശിച്ചത്.
വിഘ്നേഷ് ശിവന്റെ സഹോദരി ഐശ്വര്യയ്ക്ക് വില പിടിപ്പുള്ള സ്വർണാഭരണങ്ങളാണ് നയൻതാര നൽകിയത്. വിക്കിയുടെ സഹോദരിക്ക് മാത്രമല്ല നയൻതാര സമ്മാനം നൽകിയത്. അടുത്ത ബന്ധുക്കൾക്കും നയൻതാര വിവാഹവേദിയിൽ വെച്ചു തന്നെ സമ്മാനങ്ങൾ നൽകി. ഹൈന്ദവ ആചാരപ്രകാരമായിരുന്നു വിവാഹം നടന്നത്. ഇരുവരുടെയും വിവാഹ ചിത്രങ്ങൾ ആദ്യം പുറത്തെത്തിയത് വിക്കിയുടെ ഔദ്യോഗിക സോഷ്യൽ മീഡിയ അക്കൗണ്ടിൽ നിന്ന് ആയിരുന്നു. കാർത്തി, ഉദയനിധി സ്റ്റാലിൻ, അനിരുദ്ധ് രവിചന്ദർ, ദിലീപ്, ആറ്റ്ലി തുടങ്ങിയവരും വിവാഹത്തിൽ പങ്കെടുത്തു. വിവാഹച്ചടങ്ങുകളിലേക്ക് മാധ്യമങ്ങൾക്ക് ക്ഷണം ഉണ്ടായിരുന്നില്ല. തമിഴ് നാട്ടിലെ വിവിധ ഇടങ്ങളിലുള്ള അനാഥാലയങ്ങളിലെ ഒരു ലക്ഷത്തിൽ അധികം ആളുകൾക്ക് നയൻതാരയും വിഘ്നേഷ് ശിവനും ഭക്ഷണം നൽകി.
