പളുങ്ക് എന്ന ചിത്രത്തിലൂടെ മലയാള സിനിമയില്‍ അരങ്ങേറ്റം കുറിച്ച നസ്രിയ നസീം ഇന്ന് പ്രേക്ഷകര്‍ക്ക് ഏറെ പ്രിയങ്കരിയാണ്. സോഷ്യല്‍ മീഡിയയിലും സജീവമാണ് താരം. ഇടയ്ക്ക് താരം പങ്കുവയ്ക്കുന്ന ചിത്രങ്ങള്‍ ആരാധകര്‍ ഏറ്റെടുക്കാറുണ്ട്. ഇപ്പോഴിതാ അവധി ആഘോഷിക്കുന്നതിനിടെയില്‍ താരം പങ്കുവച്ച ചിത്രങ്ങളാണ് ശ്രദ്ധ നേടുന്നത്. നസ്രിയ ചിത്രങ്ങളില്‍ ക്യൂട്ടായിരിക്കുന്നു എന്നാണ് ആരാധകര്‍ പറയുന്നത്.
കഴിഞ്ഞ ദിവസം സ്‌കൈ ഡൈവിംഗ് നടത്തുന്ന ചിത്രങ്ങള്‍ നസ്രിയ പങ്കുവച്ചിരുന്നു. ‘അങ്ങനെ സ്വപ്നം സഫലമായി. ദുബായില്‍ പെട്ടെന്ന് എത്താനായി ഞാന്‍ വിമാനത്തില്‍ നിന്ന് ചാടിയിറങ്ങി’ എന്നായിരുന്നു ചിത്രങ്ങള്‍ക്ക് നസ്രിയ നല്‍കിയ ക്യാപ്ഷന്‍. താരങ്ങളായ നിമിഷ സജയന്‍, ശ്രിന്ധ, ശബരീഷ്, ഫര്‍ഹാന്‍ ഫാസില്‍ അടക്കം നിരവധി പേര് ചിത്രങ്ങള്‍ക്ക് കമന്റുമായി രംഗത്തെത്തിയിരുന്നു.
2006ല്‍ ആയിരുന്നു പളുങ്ക് പ്രേക്ഷകരിലേക്ക് എത്തിയത്. ബാലതാരമായിട്ടായിരുന്നു നസ്രിയയുടെ അരങ്ങേറ്റം. പിന്നീട് ഓം ശാന്തി ഓശാന, നേരം, ബാംഗ്ലൂര്‍ ഡേയ്സ് തുടങ്ങി നിരവധി ചിത്രങ്ങളില്‍ അഭിനയിച്ചു. വിവാഹ ശേഷം അഭിനയ രംഗത്തു നിന്ന് വിട്ടുനിന്ന താരം കൂടെ എന്ന ചിത്രത്തിലൂടെ തിരികെയെത്തി. ഫഹദിന്റെ നിര്‍മാണ കമ്പനിയുടെ പ്രവര്‍ത്തനങ്ങളിലും സജീവമാണ് താരം.
