മലയാളിയായ ഫിലിം മേക്കറുടെ നേതൃത്വത്തിൽ ശാരീരിക ഉപദ്രവം; പരാതിയുമായി നടി നേഹ സക്സേന

ബംഗളൂരു: മലയാളിയായി സംവിധായകന്റെ നേതൃത്വത്തിൽ താൻ ശാരീരിക ഉപദ്രവങ്ങൾക്ക് ഇരയായെന്ന് നടി നേഹ സക്സേന. ഇക്കാര്യം ഉന്നയിച്ച് നടി ബംഗളൂരു പൊലീസിൽ പരാതി നൽകി. ഇതിന് പിന്നാലെയാണ് നടി സംഭവങ്ങളുമായി ബന്ധപ്പെട്ട് വെളിപ്പെടുത്തൽ നടത്തിയിരിക്കുന്നത്. എന്റർടയിൻമെന്റ് ടൈംസിന് നൽകിയ അഭിമുഖത്തിൽ സംവിധായകൻ തന്നെ ഭീഷണിപ്പെടുത്തിയെന്നും നേഹ വ്യക്തമാക്കി. മമ്മൂട്ടി നായകനായ കസബ എന്ന സിനിമയിൽ പ്രധാന വേഷത്തിൽ നേഹ പ്രത്യക്ഷപ്പെട്ടിരുന്നു. സഖാവിന്റെ പ്രിയസഖി എന്ന സിനിമയിലും ഒരു പ്രധാനവേഷത്തിൽ അഭിനയിച്ചിട്ടുണ്ട്. എന്നാൽ, ഇപ്പോൾ സിനിമാ സെറ്റിൽ നേരിടേണ്ടി വന്ന പീഡനവും ഭീഷണിയും സൂചിപ്പിച്ച് ബംഗളൂരു പൊലീസിൽ ഇവർ പരാതി നൽകിയിരിക്കുകയാണ്. മലയാളിയായ ഒരു സംവിധായകനെക്കുറിച്ചാണ് നടിയുടെ വെളിപ്പെടുത്തൽ.

പുതിയ സിനിമയുടെ ചിത്രീകരണത്തിനിടയ്ക്ക് ആയിരുന്നു അസുഖകരമായ സംഭവങ്ങൾ നടന്നത്. തനിക്ക് താമസിക്കാൻ സൗകര്യമൊരുക്കിയ ഹോട്ടലിൽ വച്ചും വിഷമകരമായ ചില അനുഭവങ്ങൾ ഉണ്ടായിയെന്നും താരം വ്യക്തമാക്കുന്നു. ഹോട്ടൽ ഉടമ രാത്രി ചെലവഴിക്കാൻ ആവശ്യപ്പെട്ടു എന്നതടക്കമുള്ള ആരോപണങ്ങളാണ് നടി ഉന്നയിക്കുന്നത്. ഒരു മലയാളി സംവിധായകൻ ഒരുക്കുന്ന തമിഴ് സിനിമയുടെ സെറ്റിൽ വെച്ചാണ് ഇത്തരത്തിലുള്ള മോശം അനുഭവം നടിക്ക് നേരിടേണ്ടി വന്നത്. ചിത്രത്തിൽ നായക വേഷത്തിൽ പ്രത്യക്ഷപ്പെടുന്നത് സംവിധായകന്റെ മകൻ തന്നെയാണ്. ഇയാളുടെ ആദ്യ സിനിമയാണിത്. ഒരു പ്രധാന റോളിൽ നാസർ അല്ലെങ്കിൽ പ്രകാശ് രാജ് ഉണ്ടാകുമെന്ന് സംവിധായകൻ പറഞ്ഞിരുന്നെന്നും എന്നാൽ പ്രകാശ് രാജോ, നാസറോ സിനിമയുടെ ഭാഗമായില്ലെന്നും നടി വ്യക്തമാക്കുന്നു.

ഓഗസ്റ്റ് 20ന് ആയിരുന്നു സിനിമയുടെ ചിത്രീകരണം തുടങ്ങിയത്. സിനിമയ്ക്ക് വേണ്ടി ഓക്കെ പറഞ്ഞത് കോവിഡ് കാരണം പ്രതിസന്ധിയിൽ ആയതിനാൽ ആയിരുന്നു. 50,000 രൂപ അഡ്വാൻസ് തന്ന് കരാറിൽ ഒപ്പുവെച്ചു. ചിത്രീകരണം തുടങ്ങി ദിവസങ്ങൾക്കുള്ളിൽ അസ്വസ്ഥയുണ്ടാക്കുന്ന പല സംഭവങ്ങളും സെറ്റിൽ അരങ്ങേറി. എന്നാൽ, ഇതിനെക്കുറിച്ച് സംവിധായകനോട് പരാതിപ്പെട്ടപ്പോൾ അയാൾ തന്നെ ഭീഷണിപ്പെടുത്തുകയാണ് ചെയ്തത്. നിര്‍മാതാവിന് മാഫിയകളുമായി ബന്ധമുണ്ടെന്നും അദ്ദേഹത്തിന്റെ കാസിനോയില്‍ പീഡിപ്പിക്കാനായി ഒരു മുറിയുണ്ടെന്നും അവിടെ വച്ച് പീഡിപ്പിക്കാനും ബലാല്‍സംഗം ചെയ്യാനും വേണ്ടിവന്നാൽ വെടിവച്ച് കൊല്ലാനും അവര്‍ക്ക് സാധിക്കുമെന്നും സംവിധായകന്‍ ഭീഷണിപ്പെടുത്തിയെന്നും നടി പറഞ്ഞു.

അഡ്വാൻസ് മടക്കി നൽകാൻ താൻ തയ്യാറാണെന്നു പറഞ്ഞെങ്കിലും ഒരുപാട് പേരെ ബാധിക്കുന്നതിനാൽ ചിത്രീകരണം പൂർത്തിയാക്കാതെ പോകരുതെന്നും അങ്ങനെ ചെയ്താൽ ഒരുപാട് പേരെ ബാധിക്കുമെന്നും സംവിധായകൻ പറഞ്ഞു. ഇതിനെ തുടർന്ന് അവിടെ സഹിച്ചു തുടരുകയായിരുന്നു. ഷൂട്ടിങ് പാതി വഴിയില്‍ അവസാനിപ്പിച്ച് മടങ്ങുന്നത് തന്റെ പ്രഫഷണല്‍ ജീവിതത്തെയും ബാധിച്ചേക്കാമെന്നുള്ളത് കൊണ്ട് അക്കാര്യംകൂടി പരിഗണിച്ചാണ് താന്‍ അവിടെ തന്നെ നിന്നതെന്നും നേഹ വ്യക്തമാക്കുന്നു. സംവിധായകന്റെ മകൻ ചിത്രീകരണത്തിനിടെ കഴുത്തിന് പിടിച്ച് കോണിപ്പടിയിൽ നിന്ന് തള്ളിയിട്ടു. എന്നാൽ, ഈ വിഷയത്തിൽ സംവിധായകൻ പിന്നീട് ഖേദം പ്രകടിപ്പിച്ചതായും നേഹ പറഞ്ഞു. ഷൂട്ടിംഗിന്റെ അവസാന ദിവസം പ്രതിഫലം ചോദിച്ചെങ്കിലും ഇനിയും പത്ത് ദിവസം കൂടി കാത്തിരിക്കണമെന്നും നേരത്തെ പറഞ്ഞതിന്റെ 10 ശതമാനം മാത്രമേ നല്‍കാനാകൂ എന്നുമായിരുന്നു സംവിധായകന്റെ മറുപടി. തന്നെക്കുറിച്ച് ഇല്ലാക്കഥകള്‍ പറഞ്ഞ് സംവിധായകന്‍ നിര്‍മാതാവിന് മുന്നില്‍ അപമാനിച്ചെന്നും നേഹ പറഞ്ഞു. അസിസ്റ്റന്റിനെ ഭീഷണിപ്പെടുത്തുകയും അമ്മയുടെ കോൾ വന്നപ്പോള്‍ ഫോണ്‍ പിടിച്ചുവാങ്ങുകയും അസിസ്റ്റന്റിന്റെ മുന്നില്‍ വച്ച് തനിക്കെതിരെ മോശം പദപ്രയോഗങ്ങള്‍ നടത്തുകയും ചെയ്തെന്നും നേഹ പറഞ്ഞു. ഇതിന്റെ എല്ലാം സിസിടിവി ദൃശ്യങ്ങള്‍ താൻ എടുത്തിരുന്നെന്നും ദൃശ്യങ്ങള്‍ ഡിലീറ്റ് ചെയ്ത് വേഗം രക്ഷപ്പെടണമെന്ന് റിസപ്ഷനില്‍ നിന്ന് ഒരാള്‍ തന്നെ വിളിച്ചുപറഞ്ഞുവെന്നും ഒരു സുഹൃത്തിന്റെ സഹായത്തോടെ വേഗം ഹോട്ടലില്‍ നിന്ന് രക്ഷപ്പെടുകയായിരുന്നെന്നും നേഹ വ്യക്തമാക്കി. അതിനുശേഷമാണ് പൊലീസിൽ പരാതി നൽകിയത്.