നടിയെ തോക്കിൻമുനയിൽ നിർത്തി 7 ലക്ഷം കവർന്നു; തന്നെ അവർ പീഡിപ്പിക്കുമോ എന്ന് പേടിച്ചുപോയെന്ന് നടി

മാസ്‌ക് ധരിച്ചെത്തിയ അക്രമികൾ നടിയെ തോക്കിൻമുനയിൽ നിർത്തി ഏഴ് ലക്ഷം കവർന്നു. നടി നികിത രാവലിനാണ് ഈ ദുരനുഭവം ഉണ്ടായത്. ഡൽഹി ശാസ്‌ത്രി നഗറിൽ തന്റെ ആന്റിയുടെ വീട്ടിൽ ആയിരുന്നപ്പോഴാണ് സംഭവം. പോലീസ് കേസ് രജിസ്റ്റർ ചെയ്‌ത്‌ അന്വേഷണം തുടങ്ങി.

“എനിക്ക് ഇപ്പോഴും ആ സംഭവത്തിൽ നിന്നും പുറത്തുകടക്കുവാനായിട്ടില്ല. ജീവിച്ചിരിക്കുന്നുണ്ടെന്ന് പോലും വിശ്വസിക്കാനാവുന്നില്ല. ഞാൻ പ്രതികരിച്ചിരുന്നില്ലേൽ ഇന്ന് ജീവനോടെ ഉണ്ടാകുമായിരുന്നില്ല. വാർഡ്രോബിൽ ഒളിച്ചിരുന്നാണ് ഞാൻ രക്ഷപ്പെട്ടത്. ഞാൻ ആ വീട്ടിൽ ഒറ്റക്കായിരുന്നു. ആന്റി പുറത്തുപോയിരുന്നു. എന്റെ ജീവിതത്തിൽ ഏറ്റവും ഭയപ്പെടുത്തിയ സംഭവമാണിത്.” നികിത പറയുന്നു.

“രാത്രി 10 മണിയായപ്പോഴാണ് സംഭവം. ഞാൻ വീട്ടിലൂടെ വെറുതെ നടന്നുകൊണ്ടിരുന്നപ്പോഴാണ് ഒരു ഇന്നോവയിൽ നാല് പേർ മാസ്‌ക് ധരിച്ച് വീട്ടിലേക്ക് അതിക്രമിച്ച് എത്തിയത്. എന്റെ നേരെ തോക്ക് ചൂണ്ടി കൈയ്യിൽ ഉള്ളതെല്ലാം കൊടുക്കുവാൻ പറഞ്ഞു. അത് ഓർക്കുമ്പോൾ തന്നെ എനിക്ക് ഭയമാവുകയാണ്. എല്ലാം എടുത്തതിന് ശേഷം എന്നെ അവർ പീഡിപ്പിക്കുമെന്നും കൊല്ലുമെന്നും വരെ ഞാൻ ഭയപ്പെട്ടിരുന്നു. ആ പത്ത് മിനിറ്റ് എങ്ങനെയാണ് ഞാൻ കഴിച്ചുകൂട്ടിയത് എന്ന് പോലും എനിക്കറിയില്ല. അവിടെ ഒട്ടും സുരക്ഷിതമല്ല എന്ന് തോന്നിയ ഞാൻ പിറ്റേന്ന് രാവിലെ തന്നെ ഫ്‌ളൈറ്റിന് മുംബൈയിലെ വീട്ടിലേക്ക് വന്നു. ഞാൻ ഒരു ഫോർമൽ കംപ്ലയിന്റ് പോലും കൊടുത്തിരുന്നില്ല. മുംബൈയിൽ എത്തിയതിന് തൊട്ടുപിന്നാലെ ഒരു വക്കീലിനെ ഞാൻ ബന്ധപ്പെടുകയും ചെയ്‌തു. ഞാൻ നേരിട്ട് ചെല്ലാതെ എഫ് ഐ ആർ തയ്യാറാക്കാനാവില്ല എന്നാണ് പോലീസ് അറിയിച്ചത്. ഞാൻ ഉടൻ തന്നെ അങ്ങോട്ട് പോകും.” നികിത കൂട്ടിച്ചേർത്തു.

മോതിരങ്ങൾ, വാച്ച്, കമ്മൽ, ഡയമണ്ട് നെക്‌ലേസ്, ഒരു പ്രോഗ്രാമിന് ലഭിച്ച അഡ്വാൻസ് തുകയടക്കം 7 ലക്ഷം രൂപ വിലമതിക്കുന്ന വസ്തുക്കളാണ് കൊള്ളയടിക്കപ്പെട്ടത്. പോണോഗ്രാഫി കേസിൽ പോലീസ് അറസ്റ്റ് ചെയ്യപ്പെട്ട രാജ് കുന്ദ്രയെ കുറിച്ച് നടത്തിയ കമന്റിലൂടെ ഈ അടുത്ത് താരം ശ്രദ്ധ നേടിയിരുന്നു. ശിൽപ ഷെട്ടിയെ അനാവശ്യമായി കേസിലേക്ക് വലിച്ചിഴക്കുകയായിരുന്നു എന്നും താരം അഭിപ്രായപ്പെട്ടു. 2007ൽ അഭിനയലോകത്തേക്ക് കടന്ന് വന്ന നികിത മിസ്റ്റർ ഹോട്ട് മിസ്റ്റർ കൂൾ, ദി ഹീറോ അഭിമന്യു, അമ്മ കി ബോലി തുടങ്ങിയ ചിത്രങ്ങളിൽ അഭിനയിച്ചിട്ടുണ്ട്. അനിൽ കപൂറിനും ഷെഫാലി ഷാക്കുമൊപ്പം ബ്ലാക്ക് ആൻഡ് വൈറ്റിലും താരം പ്രത്യക്ഷപ്പെട്ടിട്ടുണ്ട്. 2012 മുതൽ ടോളിവുഡിലും താരം സജീവമാണ്.