നിത്യദാസിനൊപ്പം ഫോട്ടെയടുക്കുന്നതിനിടെ യുവതിയുടെ മുടിക്ക് തീപിടിച്ചു. മുടി കത്തുന്നത് നിത്യ കണ്ടതോടെ വലിയ ദുരന്തം ഒഴിവായി. കഴിഞ്ഞ ദിവസം കോഴിക്കോട് കൊടുവണ്ണിയിലാണ് സംഭവം നടന്നത്.
ഒരു ബ്യൂട്ടിപാര്‍ലര്‍ ഉദ്ഘാടനത്തിനായി എത്തിയതായിരുന്നു നിത്യദാസ്. നടന്‍ മാമുക്കോയയും ചടങ്ങിനെത്തിയിരുന്നു. ഉദ്ഘാടനത്തിന് ശേഷം എല്ലാവരും നിത്യയെ പരിചയപ്പെടുന്നതിന്റേയും ഫോട്ടെയടുക്കുന്നതിന്റെയും തിരക്കിലായിരുന്നു. ഇതിനിടെയാണ് സംഭവം. നിത്യയ്‌ക്കൊപ്പം ഫോട്ടോയെടുക്കുന്നതിനിടെ മെഴുകുതിരിയില്‍ നിന്ന് യുവതിയുടെ മുടിയിലേക്ക് തീപടരുകയായിരുന്നു. തീ മുടിയില്‍ വ്യാപിച്ചതോടെ നിത്യ ഇത് കണ്ടു. പേടിച്ചുപോയ നിത്യ നിലവിളിച്ചതോടെയാണ് മറ്റുള്ളവരും ഇത് കണ്ടത്.
അപകടത്തിന് ശേഷം ഭയപ്പെട്ട് മാറി നിന്ന നിത്യദാസ് തിരിഞ്ഞുനോക്കി അവരോട് ഫോട്ടോ എടുത്തോ എന്ന് ചോദിക്കുന്നുണ്ട്. ഇല്ല എന്ന് പറഞ്ഞപ്പോള്‍ എടുക്കാം എന്ന് പറഞ്ഞ് സമാധാനിപ്പിച്ച് അവരെ വിളിക്കുന്നത് വിഡിയോയില്‍ കാണാം. ഇതിന് ശേഷം യുവതിക്കൊപ്പം ഫോട്ടോ എടുത്ത് കുശലം പറയാനും താരം മറന്നില്ല.
