മമ്മൂട്ടി നായകനായി എത്തിയ കുഞ്ഞനന്തന്റെ കട എന്ന ചിത്രത്തിലൂടെ അഭിനയരംഗത്തേക്ക് എത്തിയ നടിയാണ് നൈല ഉഷ. ദുബായില്‍ റേഡിയോ ജോക്കിയായി ജോലി നോക്കുന്നതിനിടെയാണ് നൈല ഉഷ അഭിനയ രംഗത്തേക്ക് എത്തിയത്. തുടര്‍ന്ന് ഒരുപിടി ചിത്രങ്ങളില്‍ നൈല വേഷമിട്ടു. ഗ്യാങ്സ്റ്റര്‍, പത്തേമാരി, ഫയര്‍മാന്‍, പുണ്യാളന്‍ അഗര്‍ബത്തീസ്, പൊറിഞ്ചു മറിയം ജോസ് തുടങ്ങി നിരവധി ചിത്രങ്ങളില്‍ നൈല മികച്ച പ്രകടനം കാഴ്ചവച്ചു. സുരേഷ് ഗോപി നായകനാകുന്ന പാപ്പന്‍, ഷറഫുദ്ദീന്‍ കേന്ദ്രകഥാപാത്രത്തിലെത്തുന്ന പ്രിയന്‍ ഓട്ടത്തിലാണ് തുടങ്ങിയ ചിത്രങ്ങളാണ് നൈല ഉഷയുടേതായി പുറത്തിറങ്ങാനുള്ള ചിത്രങ്ങള്‍. ഇപ്പോഴിതാ പ്രിയന്‍ ഓട്ടത്തിലാണ് എന്ന ചിത്രത്തിന്റെ പ്രമോഷനിടെ നൈല പറഞ്ഞ വാക്കുകളാണ് ഇപ്പോള്‍ ശ്രദ്ധ നേടുന്നത്. ദുബായിലെ മമ്മൂട്ടി താാനണെന്നും അത് മമ്മൂട്ടിയോട് പറഞ്ഞിട്ടുണ്ടെന്നുമാണ് നൈല പറഞ്ഞത്.
പതിനെട്ട് വര്‍ഷമായി റേഡിയോ ജോക്കിയായി പ്രവര്‍ത്തിക്കുന്നു, ആ ജോലി വിട്ട് സിനിമയില്‍ സജീവമാകുമോ എന്ന ചോദ്യത്തിനാണ് നൈലയുടെ മറുപടി. ആ സീറ്റ് താനാര്‍ക്കും വിട്ടുകൊടുക്കില്ലെന്ന് നൈല പറഞ്ഞു. തന്നെ റേഡിയോയില്‍ കേട്ട ഒരു കുട്ടിക്ക് അന്ന് അഞ്ച് വയസാണെങ്കില്‍ ഇന്ന് അവര്‍ കല്യാണം കഴിച്ച് അഞ്ച് വയസുള്ള ഒരു കുട്ടിയുണ്ട്. താന്‍ അഞ്ച് വയസില്‍ ചേച്ചിയെ കേട്ട് തുടങ്ങിയതാണെന്ന് അവര്‍ പറഞ്ഞിട്ടുണ്ടെന്നും നൈല പറഞ്ഞു. മമ്മൂക്കയോട് താന്‍ ഇടയ്ക്ക് പറയും, ഇവിടത്തെ മമ്മൂട്ടി മമ്മൂക്കയാണെങ്കില്‍ ദുബായിലെ മമ്മൂട്ടി താനാണെന്ന്. താന്‍ മലയാളത്തിലെ ആദ്യത്തെ എഫ്.എം റേഡിയോ ജോക്കിയാണെന്നും ആ കോട്ട ആര്‍ക്കും വിട്ടുകൊടുക്കില്ലെന്നും നൈല കൂട്ടിച്ചേര്‍ത്തു.
ആന്റണി സോണി സംവിധാനം ചെയ്യുന്ന ചിത്രമാണ് പ്രിയന്‍ ഓട്ടത്തിലാണ്. നൈലയ്ക്കും ഷറഫുദ്ദീനും പുറമേ അപര്‍ണ ദാസ്, ബിജു സോപാനം, ഹക്കിം, ഷാജഹാന്‍, സുദി കോപ്പ, ജാഫര്‍ ഇടുക്കി, സ്മിനു സിജോ, അശോകന്‍, ഹരീശ്രീ അശോകന്‍ തുടങ്ങി വന്‍ താരനിരയാണ് ചിത്രത്തില്‍ അണിനിരക്കുന്നത്.
