ഫാമിലി ത്രില്ലർ വിഭാഗത്തിൽ ഉൾപ്പെടുന്ന ചിത്രമായ പത്താംവളവ് കഴിഞ്ഞ ദിവസം ആയിരുന്നു തിയറ്ററുകളിൽ റിലീസ് ചെയ്തത്. സുരാജ് വെഞ്ഞാറമൂട്, ഇന്ദ്രജിത്ത് സുകുമാരൻ, അതിഥി രവി എന്നിവരെ പ്രധാന കഥാപാത്രങ്ങളാക്കി എം പത്മകുമാർ ഒരുക്കിയ ചിത്രം തിയറ്ററുകളിൽ മികച്ച പ്രതികരണവുമായി മുന്നേറുകയാണ്. ചിത്രത്തിൽ സുരാജ് വെഞ്ഞാറമൂടിന്റെ അഭിനയം ഇതിനകം മികച്ച ഒരുപാട് പ്രതികരണങ്ങൾ സ്വന്തമാക്കി കഴിഞ്ഞു. ഒപ്പം അതിഥി രവിയുടെ കഥാപാത്രവും വലിയ പ്രശംസ സ്വന്തമാക്കുന്നുണ്ട്. ചിത്രത്തിൽ സീത എന്ന കഥാപാത്രമായാണ് അതിഥി രവി എത്തുന്നത്. നടിയുടെ കരിയറിലെ ഏറ്റവും മികച്ച കഥാപാത്രങ്ങളിൽ ഒന്നാണെന്ന് അഭിപ്രായമാണ് സീത നേടുന്നത്.
തിയറ്ററുകളിൽ മികച്ച പ്രതികരണം സ്വന്തമാക്കുന്ന ചിത്രം കാണാൻ ചിത്രത്തിലെ താരങ്ങളും എത്തി. നടൻ ഇന്ദ്രജിത്ത് സുകുമാരൻ സിനിമ കാണാൻ എത്തിയത് നടിയും ഭാര്യയുമായ പൂർണിമയ്ക്ക് ഒപ്പമായിരുന്നു. സിനിമ കണ്ട് കരഞ്ഞ് കരഞ്ഞ് തനിക്ക് ശബ്ദം ഒന്നുമില്ലെന്ന് ആയിരുന്നു പൂർണിമ ഇന്ദ്രജിത്ത് പറഞ്ഞത്. ഇന്ദ്രജിത്ത്, സുരാജ് വെഞ്ഞാറമൂട്, അതിഥി രവി എന്നിവർക്ക് ഒപ്പമായിരുന്നു പൂർണിമ സിനിമ കണ്ടത്.
‘നമ്മുടെ ഇമോഷൻസ് എല്ലാം രജിസ്റ്റർ ചെയ്ത ഒരു സിനിമ കാണാൻ പറ്റിയിട്ട് കുറച്ചു കാലമായി. ഒരു ഫാമിലി സിനിമ എന്നു പറയുമ്പോൾ ഫാമിലി ഡൈനാമിക്സ് അതിനകത്ത് വരണം. റിലേഷൻഷിപ്പ് വർക് ചെയ്യണം. സുരാജേട്ടന്റെയും ഇന്ദ്രന്റെയും മൊമന്റ്‌സില്‍ പോലും സൈലന്‍സ് വര്‍ക്ക് ചെയ്തിരിക്കുന്ന കുറേ സംഭവങ്ങളുണ്ട്. രണ്ട് അച്ഛന്മാര്‍ തമ്മിലുള്ള ബോണ്ടിങ്ങ് അല്ലെങ്കിൽ റിലേഷന്‍ഷിപ്പ് അവിടെ ഒക്കെ സൈലൻസ് ആണ് വർക് ചെയ്തിരിക്കുന്നത്.’ – അതിഥിയെയും വളരെയധികം ഇഷ്ടപ്പെട്ടെന്നും കാരണം ഒരു അമ്മയെന്ന നിലയിലും ആർട്ടിസ്റ്റ് എന്ന നിലയിലും ഒരു ഫന്റാസ്റ്റിക് വർക്ക് ആണ് അതിഥി ചെയ്തതെന്നും തിയറ്ററിൽ നിന്ന് ഇറങ്ങിയപ്പോൾ തന്നെ അതിഥിയോട് ഇക്കാര്യം പറഞ്ഞെന്നും പൂർണിമ പറഞ്ഞു. എല്ലാവരും ഈ സിനിമ കാണണമെന്നും അത്രയ്ക്കും ബ്യൂട്ടിഫുൾ ആയ സിനിമയാണ് ഇതെന്നും പൂർണിമ പറഞ്ഞു. അഭിലാഷ് പിള്ളയാണ് ചിത്രത്തിന്റെ തിരക്കഥ. അജ്മല്‍ അമീര്‍, ബിനു അടിമാലി, ജയകൃഷ്ണന്‍, മേജര്‍ രവി, സ്വാസിക, സുധീര്‍ കരമന എന്നിവരും പ്രധാന വേഷങ്ങളിൽ എത്തുന്നുണ്ട്.
