സാമന്തയുടെ കരിയർ അവസാനിച്ചെന്ന് തെലുങ്ക് നിർമാതാവ്, ഭഗവത്ഗീതയിലെ ശ്ലോകം കൊണ്ട് മറുപടി നൽകി താരം

തെന്നിന്ത്യയിലെ ഏറ്റവും താരമൂല്യമുള്ള നായികയാണ് സാമന്ത. ശാകുന്തളം ആണ് സാമന്തയുടേതായി ഏറ്റവും ഒടുവിൽ റിലീസ് ആയ ചിത്രം. എന്നാൽ, പ്രതീക്ഷിച്ച വിജയം സ്വന്തമാക്കാൻ ചിത്രത്തിന് കഴിഞ്ഞില്ല. ഇതിനിടെ സാമന്തയ്ക്ക് എതിരെ വളരെ ഗുരുതരമായ വിമർശനങ്ങളുമായി നിർമാതാവും സംവിധായകനുമായ ചിട്ടി ബാബു രംഗത്ത് എത്തിയിരിക്കുകയാണ്.

സാമന്തയുടെ സിനിമാജീവിതം അവസാനിച്ചെന്നാണ് ഒരു ദയയുമില്ലാതെ ചിട്ടി ബാബു പറഞ്ഞത്. വില കുറഞ്ഞ തന്ത്രങ്ങളാണ് സിനിമാ പ്രമോഷന് വേണ്ടി സാമന്ത പയറ്റുന്നതെന്നും നായികയായുള്ള സാമന്തയുടെ കരിയർ അവസാനിച്ചെന്നും ഇനി നായികയായി എത്താൻ സാമന്തയ്ക്ക് കഴിയില്ല എന്നുമാണ് ചിട്ടി ബാബു കുറിച്ചത്.

ജീവിക്കാനുള്ള മാർഗത്തിനു വേണ്ടിയാണ് വിവാഹമോചനത്തിന് ശേഷം സാമന്ത പുഷ്പയിൽ ഐറ്റം സോംഗ് ചെയ്തതെന്നും ചിട്ടി ബാബു ആരോപിച്ചു. രശ്മിക മന്ദാന നായികയായി എത്തിയ പുഷ്പയിലെ ഊ ആണ്ടവാ എന്ന ഐറ്റം സോംഗ് ചെയ്തത് സാമന്ത ആയിരുന്നു. അതേസമയം, ഇനി ലഭിക്കുന്ന അവസരങ്ങളുമായി സാമന്തയ്ക്ക് മുന്നോട്ട് പോകാമെന്നും ചിട്ടി ബാബു പറയുന്നു. സിനിമ പ്രമോഷന് ഇടയിൽ കരഞ്ഞുകൊണ്ട് സാമന്ത ശ്രദ്ധ നേടാൻ ശ്രമിച്ചെന്നാണ് ചിട്ടി ബാബു ആരോപിക്കുന്നത്. എല്ലാ സമയത്തും സെന്റിമെന്റ്സ് കൊണ്ട് ഫലം കാണില്ലെന്നും സിനിമയും കഥാപാത്രവും നല്ലതാണെങ്കിൽ ജനങ്ങൾ കാണുമെന്നും ചിട്ടി ബാബു പറഞ്ഞു. അതേസമയം, ഭഗവത് ഗീതയിലെ ഒരു ശ്ലോകത്തിലൂടെയാണ് സാമന്ത ഈ ആരോപണങ്ങളെ നേരിട്ടത്.