ഒരുകാലത്ത് മലയാളം, തമിഴ്, തെലുങ്ക്, കന്നഡ സിനിമകളില്‍ സജീവമായിരുന്ന നടിയാണ് സീത. സാവല്‍ എന്ന തമിഴ് ചിത്രത്തിലൂടെ ബാലതാരമായാണ് സീത സിനിമയില്‍ അരങ്ങേറ്റം കുറിച്ചത്. മലയാളത്തില്‍ ദേവാസുരം, ഹിറ്റ്‌ലര്‍, ജനം, ഭൂമിഗീതങ്ങള്‍, പിന്‍ഗാമി, നിര്‍ണയം തുടങ്ങി നിരവധി ചിത്രങ്ങളില്‍ സീത വേഷമിട്ടു. ഇപ്പോഴിതാ കുടുംബ ജീവിതത്തില്‍ ഉണ്ടായ തകര്‍ച്ചയെ കുറിച്ച് തുറന്നു പറയുകയാണ് താരം. ഫ്‌ളവേഴ്‌സ് ഒരു കോടിയില്‍ പങ്കെടുത്തപ്പോഴാണ് താരം മനസ് തുറന്നത്.
ആന്ധ്രാസ്വദേശിയായ അനിലായിരുന്നു സീതയുടെ ഭര്‍ത്താവ്. ഇരുവരുടേയും പ്രണയ വിവാഹമായിരുന്നു. തെലുങ്ക് സീരിയയില്‍ അഭിനയിക്കുമ്പോഴാണ് അനിലിനെ പരിചയപ്പെട്ടത്. തുടര്‍ന്ന് ഇരുവരും പ്രണയത്തിലാകുകയായിരുന്നു. അനിലുമായുള്ള ബന്ധത്തെ പലരും എതിര്‍ത്തിരുന്നുവെന്നും എന്നാല്‍ താനത് കാര്യമാക്കിയിരുന്നില്ലെന്നും സീത പറയുന്നു. വിവാഹക്കാര്യം സംസാരിച്ചപ്പോള്‍ താന്‍ അയാളോട് രണ്ട് വര്‍ഷത്തെ സാവകാശം ചോദിച്ചു. ആദ്യം സമ്മതിച്ചെങ്കിലും രണ്ട് മാസത്തിന് ശേഷം വിവാഹത്തിന് നിര്‍ബന്ധിച്ചു. വിവാഹം കഴിഞ്ഞും അഭിനയിക്കാന്‍ പോകാമെന്നായിരുന്നു അയാള്‍ പറഞ്ഞത്.
വിവാഹത്തിന് മുന്‍പോ ശേഷമോ അനില്‍ സ്‌നേഹത്തോടെ പെരുമാറിയിട്ടില്ലെന്ന് സീത പറയുന്നു. എപ്പോഴും വഴക്കായിരുന്നു. സ്റ്റൂള്‍ എടുത്ത് അടിക്കാനൊക്കെ വന്നിട്ടുണ്ട്. അതിനിടയില്‍ താന്‍ ഗര്‍ഭിണിയായി. ചവിട്ടും അടിയും കിട്ടിയതോടെ അബോര്‍ഷനായി. പത്ത് കൊല്ലം ആ ദാമ്പത്യ ജീവിതം ഉണ്ടായിരുന്നു. എന്നാല്‍ മൂന്ന് വര്‍ഷം മാത്രമേ ഒരുമിച്ച് ജീവിച്ചിട്ടുള്ളൂ എന്നും ഏഴ് വര്‍ഷം തന്റെ വീട്ടിലാണ് കഴിഞ്ഞതെന്നും നടി പറഞ്ഞു.
അതിനിടയില്‍ ലൊക്കേഷനില്‍ വച്ച് അടിക്കാന്‍ വന്ന സംഭവവും ഉണ്ടായിട്ടുണ്ട്. അടിയും വഴക്കും ഒക്കെയാണെങ്കിലും തനിക്ക് അയാളോട് ഇഷ്ടമായിരുന്നു. ആ സമയത്താണ് താന്‍ അഭിനയിച്ചുകൊണ്ടിരിയ്ക്കുന്ന സീരിയലില്‍ ഒരു നടനെ വേണം എന്ന് പറഞ്ഞത്. അടുത്ത് വന്നാല്‍ തനിക്ക് കാണാമല്ലോ എന്ന് കരുതി കാസ്റ്റിങ് ഡയറക്ടറോട് താന്‍ അദ്ദേഹത്തെ വിളിച്ചു നോക്കൂ എന്ന് പറഞ്ഞു. അങ്ങനെ അയാള്‍ സെറ്റിലെത്തി. ഒരു ദിവസം തന്നെ അടുത്തു വിളിച്ചു. സ്‌നേഹത്തോടെ വിളിക്കുകയാണല്ലോ എന്ന് കരുതി ചെന്നപ്പോള്‍ അവിടെയും തല്ലാന്‍ വന്നുവെന്നും സീത കൂട്ടിച്ചേര്‍ത്തു. ഒടുവില്‍ വിവാഹ ബന്ധം വേര്‍പെടുത്തി. ഡിവോഴ്‌സിന് ശേഷവും അയാള്‍ വിളിക്കുമെനന്് കരുതി. എന്നാല്‍ മറ്റൊരു വിവാഹം കഴിക്കുകയാണുണ്ടായതെന്നും സീത പറഞ്ഞു.
