മനുഷ്യരാശിക്ക് തന്നെ അപമാനമാണ് നടൻ മൻസൂർ അലി ഖാൻ എന്ന് തെന്നിന്ത്യൻ താരം തൃഷ. തനിക്കെതിരെ മൻസൂർ അലി ഖാൻ നടത്തിയ മോശം പരാമർശത്തെക്കുറിച്ച് ആയിരുന്നു തൃഷ ഇങ്ങനെ പ്രതികരിച്ചത്. ലിയോ സിനിമയുടെ സംവിധായകൻ ലോകേഷ് കനകരാജും മൻസൂർ അലി ഖാന് എതിരെ രംഗത്തെത്തി. മൻസൂറിന്റെ വാക്കുകൾ കേട്ടിട്ട് നിരാശയും രോഷവും വരുന്നതായും അയാൾ നടത്തിയത് സ്ത്രീവിരുദ്ധ പരാമർശമാണെന്നും ലോകേഷ് പറഞ്ഞു.
വളരെ ശക്തമായ ഭാഷയിലാണ് തൃഷ മൻസൂർ അലി ഖാനെതിരെ പ്രതികരിച്ചത്. ‘എന്നെക്കുറിച്ച് വെറുപ്പുളവാക്കുന്ന തരത്തിൽ മൻസൂർ അലി ഖാൻ അടുത്തിടെ സംസാരിച്ച ഒരു വീഡിയോ കണ്ടു. ശക്തമായി അതിനെ അപലപിക്കുന്നു. സെക്സിറ്റായ, അനാദരവുള്ള, സ്ത്രീവിരുദ്ധമായ മോശം മനോഭാവമുള്ള ഒരാളുടെ പ്രസ്താവനയാണ് അത്. ഇതുവരെ അയാൾക്കൊപ്പം സ്ക്രീൻ സ്പേസ് പങ്കിട്ടിട്ടില്ല എന്നതിൽ ഞാൻ സന്തോഷവതിയാണ്. എന്റെ സിനിമാജീവിതത്തിൽ അതൊരിക്കലും സംഭവിക്കില്ല എന്ന് ഞാൻ ഉറപ്പു വരുത്തും. അയാളെ പോലുള്ളവർ മനുഷ്യരാശിക്ക് തന്നെ അപമാനമാണ്’ – തൃഷ സാമൂഹ്യമാധ്യമത്തിൽ കുറിച്ചു.
തങ്ങൾ എല്ലാവരും ഒരേ ടീമിൽ പ്രവർത്തിച്ചവരാണെന്നും മൻസൂർ അലി ഖാന്റെ സ്ത്രീവിരുദ്ധ പരാമർശം കേട്ടപ്പോൾ രോഷവും നിരാശയും തോന്നിയെന്നും ലോകേഷ് കനകരാജ് കുറിച്ചു. സ്ത്രീകൾ, സഹ കലാകാരൻമാർ, പ്രൊഫഷണലുകൾ, എന്നിവരോടുള്ള ബഹുമാനം ഏത് വ്യവസായത്തിലായാലും വിട്ടു വീഴ്ചകൾക്ക് പാടില്ലാത്തതാണെന്നും ഈ പെരുമാറ്റത്തെ അപലപിക്കുന്നെന്നുമാണ് ലോകേഷ് കുറിച്ചത്. ഇതിനിടയിൽ മൻസൂർ അലി ഖാനെക്കുറിച്ച് നടൻ ഹരിശ്രീ അശോകൻ നടത്തിയ പരാമർശങ്ങൾ സോഷ്യൽ മീഡിയയിൽ വൈറലാണ്. ഒരു ബോധമില്ലാത്ത നടനാണ് മൻസൂർ അലി ഖാൻ എന്നാണ് ഹരിശ്രീ അശോകൻ പറഞ്ഞത്. സത്യം ശിവം സുന്ദരം സിനിമയുടെ ഷൂട്ടിങ്ങ് സമയത്ത് ഒരു ഫൈറ്റ് സീനിനിടയിൽ മൻസൂറിനോട് ദേഷ്യപ്പെട്ട് സംസാരിക്കേണ്ടി വന്നിട്ടുണ്ടെന്നും ഹരിശ്രീ അശോകൻ പറഞ്ഞിരുന്നു. ഏതായാലും ഹരിശ്രീ അശോകൻ പറഞ്ഞ കാര്യങ്ങൾ ശരിയാണെന്ന് തെളിയിക്കപ്പെട്ടിരിക്കുകയാണ്.
