ബോളിവുഡില്‍ തരംഗം സൃഷ്ടിച്ച് അജയ് ദേവഗണ്‍ കേന്ദ്രകഥാപാത്രമായി എത്തിയ ദൃശ്യം 2. ഏഴ് ദിവസം കൊണ്ട് ചിത്രം നൂറ് കോടിക്ക് മുകളിലാണ് കളക്ട് ചെയ്തത്. ഇന്നലെ വരെ 112.53 കോടി രൂപയാണ് ചിത്രത്തിന്റെ കളക്ഷന്‍. അവധി ദിവസമായ ഇന്ന് മിക്കയിടങ്ങളിലും ചിത്രം കാണാന്‍ വന്‍ തിരക്കാണ് അനുഭവപ്പെടുന്നത്. ഇന്നത്തെ കളക്ഷനും കൂടി പരിഗണിക്കുമ്പോള്‍ ചിത്രം 125 കോടിക്ക് മുകളില്‍ കളക്ട് ചെയ്യുമെന്നാണ് പ്രതീക്ഷിക്കുന്നത്.
നവംബര്‍ പതിനെട്ടിനായിരുന്നു ലോകമെമ്പാടുമുള്ള തീയറ്ററുകളില്‍ ദൃശ്യം 2 റിലീസ് ചെയ്തത്. ആദ്യ ദിവസം തന്നെ ചിത്രത്തിന് മികച്ച പ്രതികരണമായിരുന്നു ലഭിച്ചത്. റിലീസ് ദിവസം 15 കോടിയാണ് ചിത്രം നേടിയത്. വരും ദിവസങ്ങളിലും ചിത്രത്തിന് തിരക്ക് പ്രതീക്ഷിക്കുന്നുണ്ട്. ദൃശ്യം 2 ഹിന്ദി പതിപ്പ് 200 കോടിക്കടുത്ത് കളക്ട് ചെയ്യുമെന്നാണ് കരുതുന്നത്.
ദൃശ്യം 2 വിന്റെ തെലുങ്കും, കന്നഡ റീമേക്കുകളും ഒടിടിയിലൂടെയായിരുന്നു റിലീസിനെത്തിയത്. ദൃശ്യം 2 റീമേക്ക് പതിപ്പുകളില്‍ തീയറ്ററിലെത്തുന്ന ഒരേയൊരു ചിത്രവും ദൃശ്യം 2 ഹിന്ദി പതിപ്പാണ്. ടി സീരിസും വയാകോം 18 സ്റ്റുഡിയോസും ചേര്‍ന്നു നിര്‍മിക്കുന്ന സിനിമയുടെ കോ പ്രൊഡ്യൂസര്‍ ആന്റണി പെരുമ്പാവൂരാണ്. അഭിഷേക് പത്താന്‍ ആണ് ദൃശ്യം 2 ഹിന്ദി പതിപ്പ് ഒരുക്കിയത്. ശ്രിയ ശരണ്‍, അക്ഷയ് ഖന്ന, തബു, രജത് കപൂര്‍ എന്നിവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്.
