മരക്കാർ കണ്ട ഒരു പ്രേക്ഷകനാണ് ഞാൻ; മരക്കാരിനെ കുറിച്ച് മനസ്സ് തുറന്നു അൽഫോൻസ് പുത്രേൻ..!

മലയാളത്തിന്റെ പ്രിയ സംവിധായകൻ അൽഫോൻസ് പുത്രേൻ നമ്മുക്ക് സമ്മാനിച്ച രണ്ടു ചിത്രങ്ങളായ നേരവും പ്രേമവും ഇവിടെ സൂപ്പർ വിജയമാണ് നേടിയത്. സംവിധായകൻ എന്നതിനൊപ്പം ഒരു മികച്ച എഡിറ്റർ കൂടിയാണ് അദ്ദേഹം. ഇപ്പോൾ പൃഥ്വിരാജ് സുകുമാരൻ നായകനായ തന്റെ പുതിയ ചിത്രമായ ഗോൾഡ് പൂർത്തിയാക്കിയ അദ്ദേഹം, ആ ചിത്രത്തിന്റെ പോസ്റ്റ്-പ്രൊഡക്ഷൻ ജോലികളിലുമാണ്. അതിനിടക്ക് മോഹൻലാൽ- പ്രിയദർശൻ ടീമിന്റെ ബ്രഹ്മാണ്ഡ ചിത്രമായ മരക്കാർ അറബിക്കടലിന്റെ സിംഹം എന്ന ചിത്രത്തെ കുറിച്ച് സംസാരിക്കുകയാണ് അദ്ദേഹം. കാരണം ഈ ചിത്രം നേരത്തെ തന്നെ കണ്ട ഒരു പ്രേക്ഷകൻ കൂടിയാണ് അൽഫോൻസ് പുത്രേൻ. കഴിഞ്ഞ മാർച്ചിൽ റിലീസ് ചെയ്‌ത്‌ ഇന്ത്യ മുഴുവൻ തരംഗമായി മാറിയ ഇതിന്റെ ട്രൈലെർ എഡിറ്റ് ചെയ്തത് അൽഫോൻസ് പുത്രേൻ ആയിരുന്നു.

ഈ ചിത്രം കണ്ട ഒരു പ്രേക്ഷകൻ എന്ന നിലയിൽ അൽഫോൻസ് പുത്രേൻ പറയുന്നത്, തനിക്കു ഈ ചിത്രം ഏറെ ഇഷ്ടപ്പെട്ടു എന്നാണ്. കാലാപാനി എന്ന വമ്പൻ ചിത്രം വർഷങ്ങൾക്കു മുൻപേ നമ്മുക്ക് സമ്മാനിച്ച മോഹൻലാൽ – പ്രിയദർശൻ ടീം അതിലും വലിയ ഒരു ചിത്രമായിട്ടാണ് മരക്കാർ ഒരുക്കിയിരിക്കുന്നത് എന്നും അൽഫോൻസ് പുത്രേൻ പറയുന്നു. താൻ കൂടുതൽ എന്തെങ്കിലും തുറന്നു പറഞ്ഞാൽ, അത് ചിത്രത്തിന്റെ കഥയോ മറ്റു വിശദാംശങ്ങളോ പുറത്തു വിടുന്നത് പോലെ ആയി പോകുമെന്ന് ഭയമുള്ളതിനാലാണ് കൂടുതൽ കാര്യങ്ങൾ വിട്ടു പറയാത്തത് എന്നും അദ്ദേഹം വിശദീകരിക്കുന്നു. നേരത്തെ പ്രിയദർശൻ – മോഹൻലാൽ ടീമിന്റെ ബ്ലോക്ക്ബസ്റ്റർ വിജയമായ ഒപ്പത്തിന്റെ ട്രൈലെർ എഡിറ്റ് ചെയ്തതും അൽഫോൻസ് പുത്രേൻ ആയിരുന്നു.

മോഹൻലാലിൻറെ കടുത്ത ആരാധകനായ അൽഫോൻസ് പുത്രേൻ, താൻ അദ്ദേഹത്തെ വെച്ച് ഒരു ഫാൻ ബോയ് ചിത്രം പ്ലാൻ ചെയ്യുന്നുണ്ട് എന്നും നേരത്തെ തന്നെ വെളിപ്പെടുത്തിയിട്ടുണ്ട്. കാലാപാനിയുടെ ഇരട്ടി വലിപ്പമുള്ള കാൻവാസിൽ, ഇന്നത്തെ സാങ്കേതിക വിദ്യകൾ മികച്ച രീതിയിൽ ഉപയോഗിച്ച് കൊണ്ട്, ചെയ്തിരിക്കുന്ന ഒരു സിനിമയാണ് മരക്കാർ എന്നും, അത് നമ്മൾ സ്‌ക്രീനിൽ കാണുമ്പോൾ ഇതെന്താണ് ഈ വരുന്നത് എന്ന് ചിന്തിച്ചു പോകുന്ന തരത്തിൽ ആ ചിത്രം ഒരുക്കിയിട്ടുണ്ട് എന്നും അൽഫോൻസ് പുത്രൻ നേരത്തെ തന്നെ പറഞ്ഞിട്ടുണ്ട്. ഡിസംബർ രണ്ടിനാണ് ആഗോള റിലീസ് ആയി മരക്കാർ എത്തുക.