ഹോളിവുഡ് താരം ജോണി ഡെപ്പിനെതിരെ ഗുരുതര ആരോപണങ്ങളുമായി നടിയും മുന്‍ ഭാര്യയുമായ ആംബര്‍ ഹേഡ്. കോടതിയില്‍ പൊട്ടിക്കരഞ്ഞുകൊണ്ടാണ് ആംബര്‍ ഹേഡ് കാര്യങ്ങള്‍ വിശദീകരിച്ചത്. ജോണി ഡെപ്പ് നിരവധി തവണ തനിക്ക് നേരെ ലൈംഗിക അതിക്രമം നടത്തിതയായി ഹേഡ് പറഞ്ഞു. പൊട്ടിയ കുപ്പി ഉപയോഗിച്ച് തന്നെ ലൈംഗികമായി ആക്രമിച്ചുവെന്നും ഹേഡ് വിശദീകരിച്ചു.
വ്യാഴാഴ്ച കോടതിയില്‍ മൊഴി നല്‍കവെയാണ് പൊട്ടിക്കരഞ്ഞു കൊണ്ട് നടി ഇക്കാര്യം പറഞ്ഞത്. 2015ല്‍ ‘പൈറേറ്റ്‌സ് ഓഫ് ദി കരിബീയന്‍’ അഞ്ചാം ഭാഗം ചിത്രീകരിക്കവേ ഡെപ്പിനെ കാണുവാനായി ഓസ്‌ട്രേലിയയില്‍ പോയി. വൈകുന്നേരം ഭക്ഷണം കഴിക്കുന്നതിനിടയില്‍ തര്‍ക്കമുണ്ടാവുകയും ഡെപ്പ് തന്നെ ആക്രമിക്കുകയും ചെയ്തുവെന്ന് ആംബര്‍ ഹേഡ് പറഞ്ഞു.
ജോണി ഡെപ്പ് തന്നെ മര്‍ദിക്കുകയും വസ്ത്രം വലിച്ച് കീറുകയും ചെയ്തു. ആ സംഭവത്തില്‍ താന്‍ ഏറെ ഭയന്നിരുന്നുവെന്നും ഹേഡ് പറഞ്ഞു. എന്നാല്‍ താന്‍ ഹേഡിനെ മര്‍ദിച്ചിട്ടില്ല എന്നാണ് ഡെപ്പിന്റെ വാദം. ഹേഡ് തന്നെ മദ്യക്കുപ്പി ഉപയോഗിച്ച് മര്‍ദിക്കുകയായിരുന്നു എന്നും ഡെപ്പ് പറയുന്നു. ആക്രമണത്തിനിടെ പരുക്കുപറ്റി ചികിത്സിച്ചതിന്റെ തെളിവുകളും അദ്ദേഹം കോടതിയില്‍ സമര്‍പ്പിച്ചിട്ടുണ്ട്.
