പലതരത്തിലുള്ള ആശയസംവാദങ്ങൾക്കും ഏറ്റുമുട്ടലുകൾക്കും വികാരനിർഭരമായ നിമിഷങ്ങൾക്കും സാക്ഷിയാകുന്ന ഒന്നാണ് ബിഗ് ബോസ് ഹൗസ്. അത്തരത്തിൽ ഒരു രംഗത്തിന് ശനിയാഴ്ചയും ബിഗ് ഹോസ് ഹൗസ് സാക്ഷിയായി. പരസ്പരം പല തരത്തിലുള്ള വാക്കുകളാൽ മുറിവേൽപ്പിച്ചവർ ആലിംഗനം ചെയ്ത നിമിഷമായിരുന്നു അത്. റിയാസും ലക്ഷ്മിപ്രിയയുമായിരുന്നു ആ താരങ്ങൾ. ഇരുവരും തമ്മിൽ പലപ്പോഴും അതിരൂക്ഷമായ വാക്കുതർക്കങ്ങളും വാദപ്രതിവാദങ്ങളും നടന്നിരുന്നു. അത്തരത്തിലുള്ള വാദപ്രതിവാദങ്ങൾക്ക് ഇടയിൽ മുറിവേൽപ്പിച്ചിട്ടുണ്ടെങ്കിൽ ക്ഷമ ചോദിക്കാനുള്ള ഒരു അവസരം ആയിരുന്നു മോഹൻലാൽ നൽകിയത്.
ത്രികോണ പ്രണയത്തിന്റെ കാര്യം പറഞ്ഞ് വിഷമിപ്പിച്ചതിന് കഴിഞ്ഞദിവസം റിയാസ് ദിൽഷയോട് മാപ്പ് ചോദിച്ചിരുന്നു. ഈ സീസണിലെ തന്നെ മനോഹരനിമിഷങ്ങളിൽ ഒന്നായിരുന്നു അത്. ഇത് പറഞ്ഞുകൊണ്ടാണ് മോഹൻലാൽ മറ്റ് മത്സരാർത്ഥികൾക്കും അത്തരത്തിൽ ആരോടെങ്കിലും ക്ഷമ പറയാനുണ്ടെങ്കിൽ പറയാമെന്ന പറഞ്ഞത്. ലക്ഷ്മിപ്രിയ റിയാസിന്റെ പേരായിരുന്നു പറഞ്ഞത്. ഏതെങ്കിലും തരത്തിൽ താൻ വേദനിപ്പിച്ചിട്ടുണ്ടെങ്കിൽ ക്ഷമിക്കണമെന്ന് ലക്ഷ്മിപ്രിയ റിയാസിനോട് പറഞ്ഞു. കരഞ്ഞുകൊണ്ടായിരുന്നു ലക്ഷ്മി പ്രിയ ഇത് പറഞ്ഞത്. ഇത് കണ്ട റിയാസിന്റെയും കണ്ണ് നിറഞ്ഞു. മറ്റ് മത്സരാർത്ഥികളും കണ്ണ് നിറഞ്ഞാണ് ലക്ഷ്മിയുടെ സംസാരം കേട്ടത്.
റിയാസിനോട് ക്ഷമ പറഞ്ഞതിനു ശേഷം ലക്ഷ്മിപ്രിയ റിയാസിനെ ആശ്ലേഷിക്കുകയും ചെയ്തു. ഒരു മകനോടുള്ള വാത്സല്യമാണ് റിയാസിനോട് തനിക്ക് തോന്നിയിട്ടുള്ളതെന്നും അവർ പറഞ്ഞു. ഇരുവരും കണ്ണീരണിഞ്ഞ് ആശ്ലേഷിച്ച കാഴ്ച മറ്റു മത്സരാര്‍ഥികള്‍ക്കും പ്രേക്ഷകർക്കും മറക്കാനാവാത്ത ഒന്നായി മാറി.
