തീയേറ്ററില്‍ മികച്ച പ്രതികരണം നേടി മുന്നേറുകയാണ് ആന്റണി വര്‍ഗീസ്-ടിനു പാപ്പച്ചന്‍ കൂട്ടുകെട്ടില്‍ എത്തിയ ‘അജഗജാന്തരം’. വ്യാഴാഴ്ചയാണ് ചിത്രം റിലീസ് ചെയ്തത്. ഇപ്പോഴിതാ സിനിമ കണ്ടിറങ്ങിയ ഒരു പ്രേക്ഷകന്‍ ആന്റണിയുടെ ഇന്‍സ്റ്റഗ്രാം അക്കൗണ്ടില്‍ പോസ്റ്റ് ചെയ്ത കമന്റും അതിന് താരം നല്‍കിയ മറുപടിയും വൈറലായിരിക്കുകയാണ്.
”അളിയാ ഒരു 500 ജിപേ ചെയ്തു താ, പെട്രോള്‍ അടിച്ച് തിയേറ്ററില്‍ പോയി പടം കണ്ടിട്ട് വന്നിട്ട് അഭിപ്രായം ഇടാം. 500 ജനുവരി 5ന് മുമ്പ് സാലറി കിട്ടി കഴിഞ്ഞു തിരിച്ചു തരാം” എന്നായിരുന്നു ആരാധകന്റെ കമന്റ്. പിന്നാലെ ജിപേ നമ്പര്‍ ആവശ്യപ്പെട്ട് ആന്റണിയുടെ മറുപടിയുമെത്തി.
കമന്റിന്റെ സ്‌ക്രീന്‍ ഷോര്‍ട്ട് സോഷ്യല്‍ മീഡിയയില്‍ വൈറലായി. നിരവധി കമന്റുകളാണ് ഇതിന് ലഭിക്കുന്നത്. ഒരു ഉത്സവപറമ്പില്‍ ആനയുമായി ഏതാനും യുവാക്കളെത്തുന്നതും പിന്നാലെ 24 മണിക്കൂര്‍ നടക്കുന്ന സംഭവങ്ങളുമാണ് ചിത്രത്തിന്റെ പ്രമേയം. അര്‍ജുന്‍ അശോകന്‍, ലുക്മാന്‍, സാബു മോന്‍, ജാഫര്‍ ഇടുക്കി, വിജിലേഷ്, കിച്ചു ടെല്ലസ് എന്നിവരും ചിത്രത്തില്‍ പ്രധാന വേഷങ്ങളില്‍ എത്തുന്നുണ്ട്.
