മെയ് ദിനത്തില്‍ ഓട്ടോ ഡ്രൈവറായ പിതാവിന്റെ ചിത്രം പങ്കു വെച്ച് ആന്റണി വര്‍ഗീസ്; ഫോട്ടോയ്ക്കു പിന്നിലെ രഹസ്യം വെളിപ്പെടുത്തി താരം

ലിജോ ജോസ് പെല്ലിശ്ശേരിയുടെ അങ്കമാലി ഡയറീസ് എന്ന ചിത്രത്തിലൂടെയാണ് ആന്റണ് വര്‍ഗീസ് മലയാള സിനിമയില്‍ അരങ്ങേറ്റം കുറിച്ചത്. പിന്നീട് ടിനു പാപ്പച്ചന്‍ ഒരുക്കിയ സ്വാതന്ത്ര്യം അര്‍ധരാത്രിയില്‍, ലിജോ ജോസ് പെല്ലിശ്ശേരിയുടെ തന്നെ ജെല്ലിക്കെട്ട് എന്നീ ചിത്രങ്ങളിലൂടെയും കയ്യടി നേടി.

ഇപ്പോഴിതാ ലോക തൊഴിലാളി ദിനമായ ഇന്ന് ഓട്ടോറിക്ഷ തൊഴിലാളിയായ സ്വന്തം അപ്പന്റെ ചിത്രം പങ്കു വെച്ചിരിക്കുകയാണ് ആന്റണി. ചിത്രത്തോടൊപ്പം ആന്റണിയുടെ കുറിപ്പുമുണ്ട്. അതിങ്ങനെ, ‘അപ്പന്‍ കുറെ നേരമായിട്ടു റൂമില്‍ ചുറ്റിത്തിരിയുന്ന കണ്ടിട്ട് ഞാന്‍ ചോയിച്ചു എന്ത് പറ്റിന്ന്. ഉടനെ പറയാ 2 വര്‍ഷം മുന്‍പ് എന്നെ വച്ചു തൊഴിലാളി ദിനത്തിന്റെ അന്ന് നീ ഫോട്ടോ ഇട്ടില്ലേ ഇന്ന് തൊഴിലാളി ദിനമാണ് വേണമെങ്കില്‍ എന്റെ ഫോട്ടോ ഇട്ടോട്ടോ എനിക്ക് ബുദ്ധിമുട്ട് ഒന്നും ഇല്ലന്ന്. സംഭവം വേറൊന്നും അല്ല ഓട്ടോ സ്റ്റാന്‍ഡില്‍ ചെല്ലുമ്പോള്‍ അവിടത്തെ ചേട്ടന്മാരുടെ മുന്നിലും ഓട്ടോയില്‍ കയറുന്നവരുടെ മുന്നിലും അപ്പനൊന്ന് ആളാകണം. അപ്പന്റെ ആഗ്രഹം അല്ലെ സാധിച്ചു കൊടുക്കാം എന്നുകരുതി. കണ്ടാല്‍ അപ്പന്‍ അറിയാതെ ഞാന്‍ എടുത്ത ഫോട്ടോ ആണെന്ന് തോന്നുമെങ്കിലും ഫുള്‍ അഭിനയം ആണ്.ട

ഇനി ആന്റണി വര്‍ഗീസ് അഭിനയിച്ചു പുറത്തു വരാന്‍ ഉള്ളത് അജഗജാന്തരം, ആനപ്പറമ്പിലെ വേള്‍ഡ് കപ്പ് എന്നീ ചിത്രങ്ങള്‍ ആണ്. ഇത് കൂടാതെ പുതിയ ജിസ് ജോയ് ചിത്രത്തിലും ആന്റണി വര്‍ഗീസ് അഭിനയിക്കുന്നുണ്ട്.