ഉസ്താദ് ഹോട്ടലിന് ശേഷം അൻവർ റഷീദും ദുൽഖറും വീണ്ടും ഒന്നിക്കുന്നു

2012 ൽ അഞ്ജലി മേനോന്റെ തിരക്കഥയിൽ അൻവർ റഷീദ് ദുൽഖർ സൽമാനെ നായകനാക്കി ഒരുക്കിയ ചിത്രമായിരുന്നു ഉസ്താദ് ഹോട്ടൽ. ദുൽഖറിന്റെ കരിയറിലെ തന്നെ ഏറ്റവും മികച്ച ചിത്രമായി അത് മാറി. പിന്നീട് ഏഴ് വർഷത്തെ ഇടവേളയ്ക്ക് ശേഷം അൻവർ ഒരുക്കിയ ചിത്രമായിരുന്നു ഫഹദ് ഫാസിൽ നസ്രിയ എന്നിവരെ കേന്ദ്രകഥാപാത്രങ്ങളായി അവതരിപ്പിച്ച ട്രാൻസ്. വീണ്ടും അൻവർ റഷീദും ദുൽഖർ സൽമാനും ഒന്നിക്കുന്നു എന്ന വാർത്തകളാണ് ഇപ്പോൾ പുറത്തുവരുന്നത്.

ഇരുവരുമൊന്നിക്കുന്ന മറ്റൊരു ഹിറ്റിനായി കാത്തിരിക്കുകയാണ് ആരാധകർ. സ്ഥിരീകരിക്കാത്ത ഈ റിപ്പോർട്ടിനെ കുറിച്ചുള്ള വാർത്തകൾ പ്രചരിച്ചു കൊണ്ടിരിക്കുമ്പോഴാണ് ദുൽഖർ ചിത്രത്തിന്റെ ചില സൂചനകൾ പുറത്തുവരുന്നത്. ദുൽഖർ സൽമാൻ നായകനാകുന്ന ചിത്രത്തിൽ ഐശ്വര്യ ലക്ഷ്മി, മഞ്ജു വാര്യർ എന്നിവർ പ്രധാന കഥാപാത്രങ്ങളെ അവതരിപ്പിക്കുമെന്നും ചിത്രം നിർമ്മിക്കുന്നത് അൻവർ തന്നെയായിരിക്കുമെന്നും റിപ്പോർട്ടുകൾ സൂചിപ്പിക്കുന്നു. അൻവർ റഷീദ് ഒരുക്കുന്ന ചിത്രങ്ങളിൽ ഏറെ പ്രതീക്ഷയർപ്പിക്കുന്ന ആരാധകർ ഇരുവരും ഒന്നിക്കുന്ന ചിത്രത്തിന് ആയുള്ള ഔദ്യോഗിക സ്ഥിരീകരണത്തിനായി കാത്തിരിക്കുകയാണ്.