അടുത്ത ചിത്രം ഉറപ്പിച്ച് അറ്റ്ലീ; അറ്റ്ലീ ഇനി കിംഗ്‌ ഖാനോടൊപ്പം?

പുതിയതായി റിലീസ് ചെയ്ത ചിത്രങ്ങൾ ബോക്സ് ഓഫീസിൽ ശ്രദ്ധിക്കപ്പെടാതെ വന്നതിനെത്തുടർന്ന് അഭിനയ ജീവിതത്തിൽ നിന്നും ചെറിയ ഒരു ഇടവേള എടുത്തിരിക്കുകയായിരുന്നു ഷാരൂഖ് ഖാൻ. 2018ലെ ക്രിസ്മസ് സമയത്ത് റിലീസ് ആയ സീറോ എന്ന ചിത്രത്തിനുശേഷം അദ്ദേഹത്തിന്റെ പുതിയ റിലീസുകളും പുതിയ പ്രഖ്യാപനങ്ങളും ഒന്നുമുണ്ടായിട്ടില്ല. അദ്ദേഹത്തിന്റെ പിറന്നാൾ ദിനമായ നവംബർ രണ്ടിന് പുതിയ ചിത്രത്തെ പറ്റിയുള്ള അനൗൺസ്മെന്റ് ഉണ്ടാകുമെന്ന് ബോളിവുഡ് വൃത്തങ്ങളിൽ സംസാരമുണ്ടായിരുന്നു.

ഇപ്പോൾ ഷാരൂഖ് ഖാന്റെ പുതിയ ചിത്രത്തെ പറ്റി ഒരു സംവിധായകൻ തന്നെ വെളിപ്പെടുത്തിയിരിക്കുകയാണ്. വിജയചിത്രം ബിഗിലിന്റെ പബ്ലിസിറ്റിക്കായുള്ള വാർത്താസമ്മേളനത്തിൽ തെലുങ്ക് സംവിധായകനും തിരക്കഥാകൃത്തുമായ ഹരീഷ് ശങ്കറാണ് കിംഗ് ഖാന്റെ പുതിയ ചിത്രത്തെ പറ്റിയുള്ള വെളിപ്പെടുത്തലുകൾ നടത്തിയത്. ബിഗിൽ സംവിധാനം ചെയ്തിരിക്കുന്ന അറ്റ്‌ലിക്ക് ഒപ്പമുള്ള ഷാരൂഖാന്റെ പുതിയ ചിത്രം ഉറപ്പിച്ചിരിക്കുന്നു എന്നാണ് അദ്ദേഹം പറഞ്ഞത്. ഒരു ആരാധകൻ എന്ന നിലയിൽ ഈ ചിത്രത്തിനായി താൻ ഏറെ കാത്തിരിക്കുകയാണെന്നും അദ്ദേഹം കൂട്ടിച്ചേർത്തു.