യുവനടൻമാരായ ധ്യാൻ ശ്രീനിവാസൻ, പ്രണവ് മോഹൻലാൽ, നിവിൻ പോളി എന്നിവരെ നായകരാക്കി വിനീത് ശ്രീനിവാസൻ സംവിധാനം ചെയ്ത ചിത്രമാണ് വർഷങ്ങൾക്ക് ശേഷം. വിഷു റിലീസ് ആയി തിയറ്ററുകളിലേക്ക് എത്തിയ ചിത്രത്തിന് മികച്ച പ്രതികരണമാണ് പ്രേക്ഷകരിൽ നിന്ന് ലഭിക്കുന്നത്. പ്രണവ് മോഹൻലാലും ധ്യാൻ ശ്രീനിവാസനും കേന്ദ്ര കഥാപാത്രങ്ങളെ അവതരിപ്പിച്ചിരിക്കുന്ന ചിത്രത്തിൽ അവരേക്കാൾ കൈയടി നേടിയത് നിവിൻ പോളിയാണ്.
ചിത്രത്തിൽ നിതിൻ മുളന്തുരുത്തി അഥവാ നിതിൻ മോളി ആയാണ് നിവിൻ എത്തിയത്. സിനിമ കണ്ടിറങ്ങുമ്പോൾ ആളുകളുടെ മനസിൽ ഇരിപ്പുറപ്പിക്കുന്ന കഥാപാത്രമാണ് നിവിൻ പോളിയുടേത്. തന്റെ കഥാപാത്രത്തെയും സിനിമയെയും ഇരുകൈയും നീട്ടി സ്വീകരിച്ച പ്രേക്ഷകർക്ക് നന്ദി അറിയിച്ചിരിക്കുകയാണ് നിവിൻ പോളി. “വാക്കുകള്‍ക്ക് അപ്പുറമുള്ള നന്ദി. ഈ സ്നേഹത്തിന് എല്ലാവരോടും നന്ദി പറയുന്നു” എന്നാണ് ചിത്രത്തിന്റെ കാരക്ടർ പോസ്റ്റർ പങ്കുവെച്ചു കൊണ്ട് നിവിൻ പോളി കുറിച്ചത്.
ആദ്യദിനം കേരളത്തില്‍ നിന്ന് മാത്രം രണ്ടര കോടിയോളമാണ് ചിത്രം നേടിയത്. രണ്ടാം ദിനവും മികച്ച ഒക്കുപ്പന്‍സിയും ബുക്കിംഗുമാണ് ചിത്രത്തിന് ലഭിച്ചത്. വിഷു വാരാന്ത്യമായതിനാൽ ബോക്സ് ഓഫീസില്‍ ചിത്രം മികച്ച നേട്ടമുണ്ടാക്കുമെന്നാണ് പ്രതീക്ഷ. മെറിലാൻഡ് സിനിമാസിന്റെ ബാനറിൽ വിശാഖ് സുബ്രഹ്മണ്യമാണ് ചിത്രത്തിന്റെ നിര്‍മ്മാണം. പ്രണവ് തന്നെ നായകനായ ഹൃദയത്തിന് ശേഷം വിനീത് ശ്രീനിവാസന്‍ സംവിധാനം ചെയ്യുന്ന ചിത്രമാണ് ഇത്. അജു വർഗീസ്, കല്യാണി പ്രിയദർശൻ, ബേസിൽ ജോസഫ്, വിനീത് ശ്രീനിവാസൻ, നീരജ് മാധവ്, നീത പിള്ള, അർജുൻ ലാൽ, അശ്വത് ലാൽ, കലേഷ് രാംനാഥ്, ഷാൻ റഹ്മാൻ എന്നിങ്ങനെ ഒരു വലിയ താരനിര തന്നെയാണ് ചിത്രത്തിൽ അണിനിരക്കുന്നത്. ധ്യാൻ ശ്രീനിവാസൻ സംവിധാനം നിർവഹിച്ച ലൗ ആക്ഷൻ ഡ്രാമക്ക് ശേഷം നിവിൻ പോളി, വിനീത് ശ്രീനിവാസൻ, ധ്യാൻ ശ്രീനിവാസൻ, അജു വർഗീസ്, ബേസിൽ ജോസഫ്, വിശാഖ് സുബ്രഹ്മണ്യം എന്നിവർ വീണ്ടും ഒന്നിക്കുന്ന ചിത്രം കൂടിയാണിത്. മെറിലാൻഡ് സിനിമാസ് തന്നെയാണ് ചിത്രം ഇന്ത്യയൊട്ടാകെ തിയറ്ററുകളിൽ എത്തിക്കുന്നത്.
View this post on Instagram
