കെജിഎഫിന് ശേഷം തീയറ്റര്‍ കീഴടക്കി മറ്റൊരു കന്നഡ ചിത്രം കൂടി. കിച്ച സുദീപ് നായകനായി എത്തിയ വിക്രാന്ത് റോണയ്ക്ക് വന്‍ വരവേല്‍പ്പാണ് തീയറ്ററുകളില്‍ ലഭിക്കുന്നത്. ഇന്ത്യയിലെ ആദ്യത്തെ മിസ്ട്രീ ക്രൈം ത്രില്ലര്‍ ത്രീ ഡി വിസ്മയമാണ് ചിത്രം. ലോകമെമ്പാടും ആറായിരത്തോളം തീയറ്ററുകളിലാണ് ചിത്രം റിലീസ് ചെയ്തത്.
പ്രേക്ഷകര്‍ ആകാംക്ഷയോടെ കാത്തിരുന്ന ചിത്രമാണ് വിക്രാന്ത് റോണ. നേരത്തേ പുറത്തിറങ്ങിയ ചിത്രത്തിലെ ‘രാ രാ രാക്കമ്മ’ എന്ന ഗാനത്തിന് വന്‍ വരവേല്‍പ്പാണ് പ്രേക്ഷകര്‍ നല്‍കിയത്. അതുകൊണ്ടുതന്നെ ചിത്രത്തിനായുള്ള പ്രേക്ഷകരുടെ ആകാംക്ഷ വര്‍ധിച്ചിരുന്നു. മലയാളം ഉള്‍പ്പെടെ പല ഭാഷകളിലായാണ് ചിത്രം പ്രേക്ഷകരിലേക്കെത്തിയത്.
അനൂപ് ഭണ്ടാരി സംവിധാനം ചെയ്യുന്ന ചിത്രം ഫാന്റസി ആക്ഷന്‍ വിഭാഗത്തില്‍ പെടുന്ന ഒന്നാണ്. ശാലിനി ജാക്ക് മഞ്ജുവും അലങ്കാര്‍ പാണ്ഡ്യനും ചേര്‍ന്നു നിര്‍മിച്ച ചിത്രത്തില്‍ സുദീപിന്റെ കിച്ച ക്രിയേഷന്‍സും നിര്‍മ്മാണത്തില്‍ പങ്കാളിയാണ്. വില്യം ഡേവിഡ് ആണ് കാമറക്ക് പിന്നില്‍. ബി അജിനേഷ് ലോകനാഥ് ആണ് സംഗീത സംവിധായകന്‍. ചിത്രം കേരളത്തിലെത്തിച്ചത് ദുല്‍ഖര്‍ സല്‍മാന്റെ വേഫെയറര്‍ ഫിലിംസാണ്. ദുല്‍ഖര്‍ ആദ്യമായാണ് ഒരു അന്യഭാഷാ പാന്‍ ഇന്ത്യന്‍ ചിത്രം അവതരിപ്പിച്ചത്. വോക്‌സ് കോമും ഫിഫ് സ്റ്റുഡിയോസും ചേര്‍ന്നാണ് ചിത്രത്തിന്റെ മാര്‍ക്കറ്റിംഗ് കൈകാര്യം ചെയ്തിരിക്കുന്നത്.
