നടൻ ജോജു ജോർജിന് ഒപ്പം അനശ്വര രാജനും പ്രധാനവേഷത്തിൽ എത്തുന്ന അവിയൽ സിനിമയുടെ ട്രയിലർ എത്തി. സിനിമയുടെ രണ്ടാമത്തെ ട്രയിലറാണ് എത്തിയത്. പോക്കറ്റ് എസ്ക്യു പ്രൊഡക്ഷൻസിന്റെ ബാനറിൽ സുജിത്ത് സുരേന്ദ്രൻ ആണ് ചിത്രത്തിന്റെ നിർമാണം. ഷാനിൽ ആണ് തിരക്കഥ എഴുതി ചിത്രം സംവിധാനം ചെയ്യുന്നത്.
പുതുമുഖമായ സിറാജുദ്ദീൻ, കേതകി നാരായൺ, ആത്മീയ, അഞ്ജലി നായർ, സ്വാതി, പ്രശാന്ത് അലക്സാണ്ടർ, ഡെയിൻ ഡേവിസ്, വിഷ്ണു തുടങ്ങിയവരും പ്രധാന വേഷങ്ങളിൽ എത്തുന്നു. ജോസഫ് എന്ന ചിത്രത്തിനു ശേഷം ജോജു ജോർജും ആത്മീയയും ഒന്നിക്കുന്ന ചിത്രം കൂടിയാണിത്. കണ്ണൂർ ജില്ലയിൽ ജനിച്ചു വളർന്ന സംഗീതത്തിനോട് അതിയായ സ്നേഹമുള്ള ഒരു യുവാവിന്റെ കഥയാണ് ചിത്രം പറയുന്നത്. കൃഷ്ണൻ എന്ന ആ വ്യക്തിയുടെ ജീവിതത്തിലെ ബാല്യം, കൗമാരം, യൗവനം എന്നീ കാലഘട്ടങ്ങളിലൂടെയുള്ള ജീവിതകഥ അച്ഛൻ – മകൾ സംഭാഷണത്തിലൂടെയാണ് ചിത്രത്തിൽ അവതരിപ്പിക്കുന്നത്.
ചിത്രത്തിനായി ഛായാഗ്രഹണം നിർവഹിച്ചിരിക്കുന്നത് സുദീപ് എളമൺ, ജിംഷി ഖാലിദ്, രവി ചന്ദ്രൻ, ജിക്കു ജേക്കബ് പീറ്റർ എന്നിവരാണ്. പ്രധാന ലൊക്കേഷനുകൾ കണ്ണൂർ, ഗോവ, കൊടൈക്കനാൽ എന്നിവിടങ്ങളിൽ ആയിരുന്നു. ചിത്രത്തിന്റെ എഡിറ്റിംഗ് റഹ്മാൻ മുഹമ്മദ് അലി, ലിജോ പോൾ എന്നിവരാണ്.
