തമിഴ് നടൻ വിജയ് നായനായി എത്തിയ ചിത്രം ബീസ്റ്റ് തിയറ്ററുകളിൽ സമ്മിശ്ര പ്രതികരണമായിരുന്നു നേടിയത്. വിജയിയെ നായകനാക്കി നെൽസൺ ദിലീപ് കുമാർ സംവിധാനം ചെയ്ത ചിത്രം ഏപ്രിൽ പതിമൂന്നിന് ആയിരുന്നു റിലീസ് ചെയ്തത്. ചിത്രം റിലീസ് ചെയ്ത അന്നുമുതൽ തന്നെ ചിത്രത്തെ തേടി പോസിറ്റീവും നെഗറ്റീവുമായ കമന്റുകൾ വന്നിരുന്നു. സമ്മിശ്രപ്രതികരണമായിരുന്നു ചിത്രം നേടിയതെങ്കിലും ബോക്സ് ഓഫീസിൽ തരക്കേടില്ലാത്ത നേട്ടം സ്വന്തമാക്കാൻ ചിത്രത്തിന് കഴിഞ്ഞു. ഇരുന്നൂറ് കോടി ആഗോള കളക്ഷൻ നേടുന്ന ചിത്രമായി ബീസ്റ്റ് മാറി.
ഇപ്പോൾ സോഷ്യൽ മീഡിയയിൽ വൈറലായിരിക്കുന്നത് ചിത്രത്തിന്റെ മേക്കിംഗ് വീഡിയോയുടെ പ്രമോ ആണ്. ചിത്രത്തിന്റെ നിർമാതാക്കളായ സൺ പിക്ചേഴ്സ് ആണ് മേക്കിംഗ് വീഡിയോയുടെ പ്രമോ പുറത്തു വിട്ടിരിക്കുന്നത്. ചിത്രത്തിൽ പ്രധാനമായും പരാമർശിക്കുന്നത് ഒരു വലിയ മാൾ ഹൈജാക്ക് ചെയ്ത് അതിലുള്ള ജനങ്ങളെ ബന്ദികളാക്കിയ തീവ്രവാദികളിൽ നിന്നും അവരെ രക്ഷിക്കുന്നതാണ്. ചിത്രത്തിൽ രക്ഷകനായി എത്തുന്ന മുൻ റോ ഉഗ്യോഗസ്ഥനായ വീരരാഘവൻ എന്ന കഥാപാത്രത്തെയാണ് വിജയ് അവതരിപ്പിക്കുന്നത്. ചിത്രത്തിൽ ആളുകളെ ബന്ദികളാക്കിയ ആ മാൾ ആണ് ഇപ്പോൾ പുറത്തുവിട്ടിരിക്കുന്നത്. ചിത്രത്തിനു വേണ്ടി മാൾ പൂർണമായും സെറ്റിട്ട് എടുക്കുകയായിരുന്നു. ചിത്രത്തിൽ ചെന്നൈ ഈസ്റ്റോ കോസ്റ്റ് മാൾ ആയാണ് ആ മാൾ കാണിച്ചത്.
അതേസമയം, പ്രമോ വീഡിയോയിൽ ചിത്രത്തിലെ ഈ മാൾ പൂർണമായും സെറ്റിട്ടതാണെന്ന് വ്യക്തമാക്കുന്നു. ചിത്രത്തിന്റെ മേക്കിംഗ് വീഡിയോ ഏപ്രിൽ 24ന് റിലീസ് ചെയ്യും. ചിത്രത്തിന് വേണ്ടി കലാസംവിധാനം നിർവഹിച്ചിരിക്കുന്നത് നടൻ കൂടിയായ ഡികെ കിരൺ ആണ്. ബീസ്റ്റിനു മുമ്പ് നെൽസൺ സംവിധാനം ചെയ്ത ശിവ കാർത്തികേയൻ നായകനായ ഡോക്ടർ എന്ന ചിത്രത്തിനും കലാസംവിധാനം നിർവഹിച്ചത് കിരൺ ആയിരുന്നു. ബീസ്റ്റിൽ പൂജ ഹെഗ്ഡെ ആണ് നായികയായി എത്തിയത്. മലയാളി താരങ്ങളായ ഷൈൻ ടോം ചാക്കോ, അപർണ ദാസ് എന്നിവരും ചിത്രത്തിൽ ശ്രദ്ധേയ കഥാപാത്രങ്ങളെ അവതരിപ്പിച്ചിട്ടുണ്ട്.
