ഇന്നും മലയാളികളുടെ പ്രിയപ്പെട്ട ചിത്രമാണ് പ്രിയദര്‍ശന്‍ സംവിധാനം ചെയ്ത വെട്ടം. ഭാവ്‌ന പാനി എന്ന നടിയാണ് ചിത്രത്തില്‍ നായികാ വേഷം ചെയ്തത്. ഭാവ്‌നയുടെ ആദ്യ മലയാള സിനിമയായിരുന്നു വെട്ടം. ചിത്രത്തില്‍ വീണ എന്ന കഥാപാത്രത്തെ അവതരിപ്പിച്ച ഭാവ്‌ന ഇന്നും മലയാളികള്‍ക്ക് പ്രിയങ്കരിയാണ്.
നടിയും മോഡലും നര്‍ത്തകിയുമാണ് ഭാവ്‌ന പാനി. സോഷ്യല്‍ മീഡിയയില്‍ ആക്ടീവായ ഭാവ്‌നയുടെ ഇപ്പോഴത്തെ ചിത്രങ്ങള്‍ കണ്ടാല്‍ വെട്ടത്തിലെ തീപ്പെട്ടി കൊള്ളിയാണോ ഇതെന്ന സംശയം തോന്നും. സോഷ്യല്‍ മീഡിയയില്‍ സജീവമായ ഭാവ്‌ന തന്റെ യോഗ ചിത്രങ്ങളും ഡാന്‍സ് വീഡിയോകളുമൊക്കെ ഇന്‍സ്റ്റഗ്രാമില്‍ പങ്കു വെക്കാറുണ്ട്.
ഒറ്റ മലയാളം സിനിമയിലെ നായികയായിട്ടുള്ളൂവെങ്കിലും മലയാളി സിനിമാ പ്രേമികള്‍ക്ക് ഏറെ പ്രിയമാണ് ഭാവ്‌നയെ. സിനിമാഗ്രൂപ്പുകളിലടക്കം വെട്ടം സിനിമയിലെ വീണയുടെ ചിത്രങ്ങള്‍ സഹിതം ഇപ്പോഴും പലരും കുറിപ്പുകള്‍ പങ്കുവയ്ക്കാറുണ്ട്. വെട്ടത്തിനുശേഷം ‘ആമയും മുയലും’ എന്ന സിനിമയില്‍ ഐറ്റം ഡാന്‍സറായി ഭാവ്‌ന എത്തിയിട്ടുണ്ട്. ബോളിവുഡിലാണ് താരം സജീവമായിരുന്നത്. കന്നഡ, തെലുങ്ക് സിനിമകളിലും ഭാവ്‌ന അഭിനയിച്ചിട്ടുണ്ട്. 2019ല്‍ പുറത്തിറങ്ങിയ ‘സ്‌പേസ് മോംമ്‌സ്’ ആണ് അവസാനം അഭിനയിച്ച ചിത്രം.
