മമ്മൂട്ടിയും അമല്‍ നീരദും ഒന്നിച്ച ഭീഷ്മപര്‍വ്വം തീയറ്ററുകളില്‍ പ്രദര്‍ശന വിജയം തുടരുകയാണ്. മികച്ച അഭിപ്രായമാണ് ചിത്രത്തിന് ലഭിച്ചിരിക്കുന്നത്. നിരവധി പേര്‍ സിനിമയെ അഭിനന്ദിച്ച് രംഗത്തെത്തി. ഇപ്പോഴിതാ നടനും സംവിധായകനുമായ ബേസില്‍ ജോസഫും ചിത്രത്തെ പ്രശംസിച്ച് രംഗത്തെത്തിയിരിക്കുകയാണ്. ‘ഭീഷ്മ ഇസ് ഫയര്‍’ എന്നാണ് ബേസില്‍ ജോസഫ് ഇന്‍സ്റ്റഗ്രാമിലൂടെ പ്രതികരിച്ചത്.
മമ്മൂട്ടിയുടെ മികച്ച ആക്ഷന്‍ ചിത്രം കാണാന്‍ സാധിച്ചതില്‍ സന്തോഷം ഉണ്ടെന്നും ബേസില്‍ ജോസഫ് പറഞ്ഞു. ഭീഷ്മപര്‍വ്വം പോലൊരു സിനിമ ഒരുക്കിയതിന് അമല്‍ നീരദിനും ബേസില്‍ നന്ദി പറഞ്ഞു. സിനിമയുടെ മറ്റ് അണിയറ പ്രവര്‍ത്തകരെയും അദ്ദേഹം അഭിനന്ദിച്ചു.
മാര്‍ച്ച് മൂന്നിനാണ് ഭീഷ്മപര്‍വ്വം തീയറ്ററുകളിലെത്തിയത്. ബിഗ് ബിക്ക് ശേഷം മമ്മൂട്ടിയും അമല്‍ നീരദും ഒന്നിച്ചെത്തിയ ചിത്രം ഏറെ പ്രതീക്ഷയോടെയായിരുന്നു പ്രേക്ഷകര്‍ നോക്കിക്കണ്ടത്. പ്രേക്ഷകരോടും മമ്മൂട്ടി ആരാധകരോടും നൂറ് ശതമാനം നീതി പുലര്‍ത്താന്‍ ചിത്രത്തിനായെന്നാണ് പലരും അഭിപ്രായപ്പെട്ടത്. 1980കളിലെ കൊച്ചിയുടെ പശ്ചാത്തലത്തിലാണ് സിനിമ കഥ പറയുന്നത്. മൈക്കിള്‍ എന്ന കഥാപാത്രമായാണ് മമ്മൂട്ടി ചിത്രത്തില്‍ എത്തുന്നത്. അമല്‍ നീരദ് പ്രൊഡക്ഷന്‍സിന്റെ ബാനറില്‍ അമല്‍ നീരദ് തന്നെയാണ് ചിത്രം നിര്‍മിച്ചിരിക്കുന്നത്. ആനന്ദ് സി ചന്ദ്രനാണ് ചിത്രത്തിന്റെ ഛായാഗ്രാഹണം. അമല്‍ നീരദും ദേവദത്ത് ഷാജിയും ചേര്‍ന്നാണ് തിരക്കഥ.
