മമ്മൂട്ടിയെ നായകനാക്കി അമൽ നീരദി സംവിധാനം ചെയ്ത ചിത്രമായ ഭീഷ്മ പർവം മികച്ച അഭിപ്രായം നേടി തിയറ്ററുകളിൽ പ്രദർശനം തുടരുകയാണ്. കേരളത്തിന് ഒപ്പം രാജ്യത്തെ മറ്റ് സ്ഥലങ്ങളിലും ഗൾഫ്, കാനഡ എന്നിവിടങ്ങളിലുമാണ് ചിത്രം റിലീസ് ചെയ്തത്. അമേരിക്ക, ബ്രിട്ടൺ, യൂറോപ്പ്, ഓസ്ട്രേലിയ, ന്യൂസിലാൻഡ് എന്നീ രാജ്യങ്ങളിൽ ഈ ചിത്രം ഇതുവരെ റീലീസ് ചെയ്തിട്ടില്ല. ഈ സ്ഥലങ്ങളിൽ വരുന്ന ആഴ്ച ആയിരിക്കും റിലീസ്.
എന്നാൽ, ‘ഭീഷ്മ പർവം’ സിനിമയുടെ ഓസ്ട്രേലിയൻ / ന്യൂസിലാൻഡ് വിതരണാവകാശം മമ്മൂട്ടിയുടെ കരിയറിലെ തന്നെ ഏറ്റവും വലിയ തുകയ്ക്ക് ആണ് വിറ്റു പോയിരിക്കുന്നത്. എന്നാൽ, തുക എത്രയെന്ന് സംബന്ധിച്ച് കൃത്യമായ റിപ്പോർട്ടുകളില്ല. അതുകൊണ്ടു തന്നെ മലയാളത്തിലെ ഏറ്റവും ഉയർന്ന തുക ലഭിച്ച ചിത്രങ്ങളുടെ ലിസ്റ്റിൽ എത്രാമതാണ് ഭീഷ്മപർവം എന്ന് വ്യക്തമല്ല. ഇങ്ങനെയൊക്കെ ആണെങ്കിലും മലയാളത്തിലെ ഏറ്റവും വലിയ ഓസ്ട്രേലിയൻ / ന്യൂസിലാൻഡ് റിലീസ് ലഭിക്കുന്ന ചിത്രങ്ങളുടെ ലിസ്റ്റിൽ ഭീഷ്മപർവം ഇടം പിടിച്ചേക്കും.
എം കെ എസ് ഗ്രൂപ്പാണ് ഇതിന്റെ വിതരണാവകാശം സ്വന്തമാക്കിയിരിക്കുന്നത്. ഭീഷ്മപർവത്തിന്റെ വിതരണാവകാശം സ്വന്തമാക്കിയതിൽ തനിക്ക് അഭിമാനം ഉണ്ടെന്ന് എം കെ എസ് ഗ്രൂപ്പ് മാനേജിങ് ഡയറക്ടർ താസ് നവനീതാരാജ് പറഞ്ഞു. ഒരു ഇന്ത്യൻ സിനിമയ്ക്ക് ലഭിക്കാവുന്ന ഏറ്റവും വലിയ റിലീസ് ആയിരിക്കും ഈ ചിത്രത്തിനായി ഒരുങ്ങുന്നതെന്നാണ് ലഭിക്കുന്ന സൂചന.
