ഏറെ ആകാംക്ഷയോടെ ബിഗ്‌ബോസ് മലയാളം സീസണ്‍ 3 ഗ്രാന്റ് ഫിനാലേയ്ക്കായി പ്രേക്ഷകര്‍ കാത്തിരിക്കുകയായിരുന്നു. മണിക്കുട്ടന്‍ കപ്പുയര്‍ത്തിയിരിക്കുന്നു എന്നാണ് ഇപ്പോള്‍ പുറത്ത് വരുന്ന വിവരങ്ങള്‍. കപ്പ് ഉയര്‍ത്തി മുത്തം നല്‍കുന്ന മണിക്കുട്ടന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലായിക്കഴിഞ്ഞു. ബിഗ്‌ബോസ് പ്രേക്ഷകരുടെ സോഷ്യല്‍ മീഡിയ കൂട്ടായ്മയിലാണ് ചിത്രങ്ങളും റിപ്പോര്‍ട്ടുകളുമൊക്കെ വൈറലായി മാറുന്നത്. പ്രതീക്ഷിച്ചത് പോലെ സംഭവിച്ചുവെന്നാണ് ബിഗ്‌ബോസ് പ്രേമികള്‍ പറയുന്നത്.
എന്നാല്‍ ഇന്ന് ചിത്രീകരണം കഴിഞ്ഞോ എന്ന് ഇതുവരെ ഔദ്യോഗികമായി സ്ഥിരീകരിച്ചിട്ടില്ല. ഇന്ന് നടന്നത് ബിഗ്‌ബോസ് സ്‌പെഷ്യല്‍ ഓണപ്പരിപാടിയാണെന്ന തരത്തില്‍ റിപ്പോര്‍ട്ടുണ്ടായിരുന്നു. അതിനാല്‍ എപ്പിസോഡ് ടെലികാസ്റ്റ് ചെയ്താല്‍ മാത്രമേ മണിക്കുട്ടന്റെ പക്കലുള്ളത് യഥാര്‍ത്ഥ ട്രോഫി തന്നെയാണോ എന്ന് തിരിച്ചറിയാന്‍ സാധിക്കൂ.
ഒരാഴ്ച മുന്‍പ് മുതല്‍ക്കെ ചെന്നൈയിലേക്കെത്തിയ മത്സരാര്‍ത്ഥികള്‍ ഓരോ സന്തോഷനിമിഷങ്ങളും സോഷ്യല്‍ മീഡിയയിലൂടെ പങ്കുവെച്ചിരുന്നു. ബിഗ്‌ബോസ് ഗ്രാന്റ് ഫിനാലേയ്ക്ക് സീസണ്‍ 3 ഫൈനലിസ്റ്റുകള്‍ മാത്രമല്ല പുറത്തായ മത്സരാര്‍ത്ഥികളും കൂടാതെ മറ്റു സീസണുകളിലെ മത്സരാര്‍ത്ഥികളുമൊക്കെ എത്തിയിരുന്നു.
ഫിനാലേയ്ക്കായി നടിമാരായ ദുര്‍ഗ്ഗ കൃഷ്ണന്‍, സാനിയ ഇയ്യപ്പന്‍ എന്നിവരും നേരത്തേ തന്നെ കൊച്ചിയിലെത്തിയിരുന്നു. ഇപ്പോള്‍ പുറത്ത് വരുന്ന വിവരം അനുസരിച്ച് ഓഗസ്റ്റ് ആദ്യവാരം തന്നെ ഫിനാലെ എപ്പിസോഡ് ടെലികാസ്റ്റ് ചെയ്‌തേക്കാം. എന്നാല്‍ ഇക്കാര്യത്തെ കുറിച്ച് ചാനല്‍ സ്ഥിരീകരിച്ചിട്ടില്ല. നാലാം സ്ഥാനം റംസാനും അഞ്ചാം സ്ഥാനം അനൂപും ആറാമതായി കിടിലം ഫിറോസും എത്തിയെന്നും റിപ്പോര്‍ട്ടില്‍ പറയുന്നു. ഏഴാമത് ഋതുവും എട്ടാമതായി നോബിയുമെത്തിയതായി റിപ്പോര്‍ട്ടിലുണ്ട്.
അവതാരകനായ മോഹന്‍ലാലിനൊപ്പം ജഗദീഷും ആര്യയും ഗായിക കെഎസ് ചിത്രയുമടക്കമുള്ളവര്‍ ഫിനാലേയില്‍ ഉണ്ടായിരുന്നു. ഇവരൊന്നിച്ചുള്ള ഒരു ചിത്രവും സോഷ്യല്‍ മീഡിയയില്‍ വൈറലായി മാറിയിരുന്നു. ബിഗ്‌ബോസ് മലയാളം ഗ്രാന്റ് ഫിനാലേ ഷൂട്ടില്‍ എല്ലാ സീസണിലെയും പരമാവധി മത്സരാര്‍ത്ഥികളെയും ഉള്‍പ്പെടുത്തിയെന്നും റിപ്പോര്‍ട്ടില്‍ പറയുന്നു.
