ബോളിവുഡ് താരം ഹൃത്വിക് റോഷനും സബ ആസാദും പ്രണയത്തിലാണെന്നാണ് കഴിഞ്ഞ കുറച്ചു നാളുകളായി പ്രചരിക്കുന്ന വാര്‍ത്തകള്‍. ഇരുവരും ഒരുമിച്ച് മുംബൈയിലെ റസ്റ്റോറന്റില്‍ എത്തിയതോടെയാണ് വാര്‍ത്തകള്‍ പ്രചരിച്ചുതുടങ്ങിയത്. അടുത്തിടക്ക് ഹൃത്വിക്കിന്റെ കുടുംബത്തിനൊപ്പം അവധി ദിനം ആഘോഷിക്കുന്ന സബയുടെ ചിത്രങ്ങളും പ്രചരിച്ചിരുന്നു.
ഇപ്പോഴിതാ ഹൃത്വിക്കിനും സബയ്ക്കുമൊപ്പം ഹൃത്വിക്കിന്റെ മുന്‍ ഭാര്യ സൂസന്‍ ഖാനും കാമുകന്‍ അര്‍സ്ലാനും ഒന്നിച്ചു നില്‍ക്കുന്ന ചിത്രമാണ് വൈറലായിരിക്കുന്നത്. സൂസന്‍ ഖാന്റെ പുതിയ ഹോട്ടലിന്റെ ഉദ്ഘാടനത്തിന് ഹൃത്വിക് റോഷനൊപ്പം എത്തിയതായിരുന്നു സബ.
നടന്‍ അര്‍സ്ലാന്‍ ഗോണിയുമായുള്ള പ്രണയം സൂസന്‍ ഖാന്‍ നേരത്തേ വെളിപ്പെടുത്തിയിരുന്നു. ഇരുവരും ഒന്നിച്ച് വിമാനത്താവളത്തില്‍ നിന്ന് ഇറങ്ങി വരുന്ന വിഡിയോയും സോഷ്യല്‍ മീഡിയയില്‍ വൈറലായിരുന്നു. 2000ലായിരുന്നു ഹൃത്വികും സൂസനും വിവാഹിതരായത്. 2014ല്‍ ഇരുവരും വിവാഹമോചിതരായി. ഹൃതാന്‍, ഹൃഹാന്‍ എന്നീ രണ്ട് മക്കളുണ്ട് ഇവര്‍ക്ക്.
