മമ്മൂട്ടി ചിത്രം സിബിഐ 5 ദി ബ്രയിന്‍ റിലീസ് തീയതി പ്രഖ്യാപിച്ചു. മെയ് ഒന്നിന് ചിത്രം ലോകമെമ്പാടും റിലീസ് ചെയ്യും. ചിത്രത്തിന്റെ സെന്‍സറിംഗ് നടപടികള്‍ പൂര്‍ത്തിയായി. യു.എ സര്‍ട്ടിഫിക്കറ്റാണ് ചിത്രത്തിന് ലഭിച്ചിരിക്കുന്നതെന്ന് അണിയറപ്രവര്‍ത്തകര്‍ അറിയിച്ചു.
സിബിഐ സീരിസിലെ നാലാം ഭാഗം ഇറങ്ങി പതിനേഴ് വര്‍ഷങ്ങള്‍ക്കിപ്പുറമാണ് പ്രേക്ഷകരെ ആകാംക്ഷയുടെ മുള്‍മുനയില്‍ നിര്‍ത്താന്‍ സേതുരാമയ്യരും സംഘവും എത്തുന്നത്. കെ. മധു തന്നെയാണ് അഞ്ചാം ഭാഗത്തിന്റേയും സംവിധായകന്‍. തിരക്കഥയൊരുക്കിയിരിക്കുന്നത് എസ്.എന്‍ സ്വാമി. ഏറെ പ്രതീക്ഷയോടെയാണ് സിബിഐ 5 ദി ബ്രെയിനായി പ്രേക്ഷകര്‍ കാത്തിരിക്കുന്നത്.
1988 ലാണ് സിബിഐ സീരിസിലെ ആദ്യ ഭാഗമായ ഒരു സിബിഐ ഡയറിക്കുറിപ്പ് ഇറങ്ങിയത്. തുടര്‍ന്ന് ജാഗ്രത, സേതുരാമയ്യര്‍ സിബിഐ, നേരറിയാന്‍ സിബിഐ തുടങ്ങിയ ചിത്രങ്ങളുമെത്തി. അപകടത്തില്‍ പരുക്കേറ്റ് സിനിമയില്‍ നിന്ന് പൂര്‍ണമായും വിട്ടുനില്‍ക്കുന്ന നടന്‍ ജഗതി തിരിച്ചെത്തുന്നു എന്നതും ചിത്രത്തിന്റെ പ്രത്യേകതയാണ്. ആശാ ശരത്താണ് ചിത്രത്തിലെ നായിക. മുകേഷ്, സായ്കുമാര്‍, ജഗതി, രഞ്ജി പണിക്കര്‍, സൗബിന്‍ ഷാഹിര്‍, ദിലീഷ് പോത്തന്‍, അനൂപ് മേനോന്‍, പ്രശാന്ത് അലക്സാണ്ടര്‍, ജയകൃഷ്ണന്‍, സുദേവ് നായര്‍, അസീസ് നെടുമങ്ങാട്, സന്തോഷ് കീഴാറ്റൂര്‍, ഇടവേള ബാബു, പ്രസാദ് കണ്ണന്‍, കോട്ടയം രമേശ്, സുരേഷ് കുമാര്‍, തന്തൂര്‍ കൃഷ്ണന്‍, അന്ന രേഷ്മ രാജന്‍, അന്‍സിബ ഹസന്‍ തുടങ്ങി വന്‍ താരനിരയാണ് ചിത്രത്തില്‍ അണിനിരക്കുന്നത്. ചിത്രത്തിലെ ഐക്കോണിക് തീം മ്യൂസിക് ഒരുക്കുന്നത് സംഗീത സംവിധായകന്‍ ശ്യാമിന് പകരം ജേക്‌സ് ബിജോയ് ആണ്. സ്വര്‍ഗചിത്രയാണ് നിര്‍മ്മാണം. അഖില്‍ ജോര്‍ജ് ഛായാഗ്രഹണവും ശ്രീകര്‍ പ്രസാദ് എഡിറ്റിംഗും നിര്‍വഹിച്ചിരിക്കുന്നു.
