യുവതാരം ശ്രീനാഥ് ഭാസി നായകനായി എത്തുന്ന ‘ചട്ടമ്പി’ എന്ന സിനിമയുടെ രണ്ടാമത്തെ ട്രയിലർ റിലീസ് ചെയ്തു. സെപ്തംബർ 23ന് ചിത്രം റിലീസ് ആകും. തിരുവനന്തപുരത്ത് നടന്ന ചടങ്ങിലാണ് അണിയറ പ്രവർത്തകർ ട്രയിലർ പുറത്തുവിട്ടത്. മ്യൂസിക് 24 7 യുട്യൂബ് ചാനലിലൂടെയാണ് ട്രയിലർ റിലീസ് ചെയ്തത്. അഭിലാഷ് എസ് കുമാറാണ് ചിത്രം സംവിധാനം ചെയ്തിരിക്കുന്നത്. ട്രയിലർ റിലീസ് ചെയ്ത ചടങ്ങിൽ ശ്രീനാഥ് ഭാസി, ഗ്രേസ് ആന്റണി, സംവിധായകൻ അഭിലാഷ്, എക്സിക്യുട്ടീവ് പ്രൊഡ്യൂസർ സിറാജ് എന്നിവർ പങ്കെടുത്തു.
ആർട്ട് ബീറ്റ് സ്റ്റുഡിയോയുടെ ബാനറിൽ ആസിഫ് യോഗിയാണ് ചിത്രം നിർമ്മിച്ചത്. 1990കളിലെ ഇടുക്കിയുടെ പശ്ചാത്തലത്തിൽ ഒരു ചട്ടമ്പിയുടെ കഥയാണ് ചിത്രം പറയുന്നത്. ശ്രീനാഥ് ഭാസിയെ കൂടാതെ ചിത്രത്തിൽ ചെമ്പൻ വിനോദ് ജോസ്, ഗുരു സോമസുന്ദരം, ബിനു പപ്പു, ഗ്രേസ് ആന്റണി, മൈഥിലി, ആസിഫ് യോഗി തുടങ്ങിയവർ അഭിനയിക്കുന്നുണ്ട്. ഡോൺ പാലത്തറയുടെ കഥയ്ക്ക് തിരക്കഥ ഒരുക്കിയത് ചിത്രത്തിന്റെ സിനിമാട്ടോഗ്രാഫർ കൂടിയായ അലക്‌സ് ജോസഫ് ആണ്.
സിറാജ്, സന്ദീപ്, ഷനിൽ, ജെസ്ന ആഷിം എന്നിവർ സഹ നിർമ്മാതാക്കൾ ആയ ചിത്രത്തിന്റെ എക്സിക്യൂട്ടീവ് പ്രൊഡ്യൂസർ സിറാജ് ആണ്. മാജിക് ഫ്രെയിംസ് ആണ് വിതരണം. സെബിൻ തോമസ് കലാ സംവിധാനവും ശേഖർ മേനോൻ സംഗീതവും നിർവഹിച്ചിരുന്നു. ജോയൽ കവിയാണ് എഡിറ്റർ.
