ദുല്‍ഖര്‍ സല്‍മാന്‍ നായകനായി എത്തുന്ന ഹേയ് സിനാമിക തീയറ്ററുകളിലേക്ക് എത്തുകയാണ്. പ്രശസ്ത നൃത്ത സംവിധായക ബ്രിന്ദ മാസ്റ്ററാണ് ചിത്രം സംവിധാനം ചെയ്തിരിക്കുന്നത്. ബ്രിന്ദ മാസ്റ്ററുടെ ആദ്യ സംവിധാന സംരംഭം ആയതുകൊണ്ടുതന്നെ ഏറെ ആകാംക്ഷയോടെയാണ് ഹേയ് സിനാമിക സിനിമ ലോകം നോക്കി കാണുന്നത്. പ്രണയവും സംഗീതവും നൃത്തവുമെല്ലാം ചേര്‍ന്ന് ഒരു പുതിയ വിഭാവമാകും പ്രേക്ഷകര്‍ക്ക് മുന്നിലെത്തുക.
മികച്ച നൃത്ത സംവിധാനത്തിനുള്ള ദേശീയ അവാര്‍ഡ് ഒരു തവണയും, തമിഴ്‌നാട് സംസ്ഥാന അവാര്‍ഡ് രണ്ടു തവണയും, കേരളാ സംസ്ഥാന ചലച്ചിത്ര അവാര്‍ഡ് നാല് തവണയും നേടിയ കലാകാരിയാണ് ബ്രിന്ദ മാസ്റ്റര്‍. ദയ എന്ന മലയാള ചിത്രത്തിന്റെ നൃത്ത സംവിധാനത്തിനാണ് ബ്രിന്ദ മാസ്റ്റര്‍ക്ക് ദേശീയ പുരസ്‌കാരം ലഭിക്കുന്നത്. രണ്ടായിരത്തില്‍ റിലീസ് ചെയ്ത മുഖവരി എന്ന ചിത്രത്തിലൂടെ തമിഴ്‌നാട് സര്‍ക്കാരിന്റെ പുരസ്‌കാരം ആദ്യമായി ലഭിച്ചു. തുടര്‍ന്ന് ദീപാവലി എന്ന ചിത്രത്തിലൂടെ രണ്ടാമത്തെ അവാര്‍ഡും സ്വന്തമാക്കി. ഉദയനാണ് താരം, വിനോദയാത്ര, കല്‍ക്കട്ട ന്യൂസ്, മരക്കാര്‍ അറബിക്കടലിന്റെ സിംഹം എന്നീ ചിത്രങ്ങളിലൂടെയാണ് കേരള സംസ്ഥാന അവാര്‍ഡ് നാല് തവണ ബ്രിന്ദ മാസ്റ്റര്‍ സ്വന്തം പേരിലാക്കിയത്.
മധുരൈ, വാരണം ആയിരം, കടല്‍, ബോളിവുഡ് ചിത്രം പി കെ, വിജയ് ചിത്രം തെരി എന്നിവയാണ് ബ്രിന്ദ മാസ്റ്റര്‍ നൃത്ത സംവിധാനം ചെയ്ത ശ്രദ്ധേയ ചിത്രങ്ങള്‍. ഈ അടുത്തിടെ റിലീസ് ചെയ്ത് സൂപ്പര്‍ ഹിറ്റായി മാറിയ ഗാന്ധാരി എന്ന തെലുങ്കു മ്യൂസിക് വിഡിയോ സംവിധാനം ചെയ്തതും ബ്രിന്ദ മാസ്റ്റര്‍ ആണ്. കീര്‍ത്തി സുരേഷ് ആണ് അതില്‍ നായികയായി എത്തിയത്. ജയന്തി, ഗിരിജ, രഘുറാം മാസ്റ്റര്‍, കല മാസ്റ്റര്‍, ഗായത്രി രഘുറാം, പ്രസന്ന സുജിത് തുടങ്ങി ഒട്ടേറെ നൃത്ത സംവിധായകര്‍ അടങ്ങുന്ന ഒരു കുടുംബത്തിലെ അംഗം കൂടിയാണ് ബ്രിന്ദ മാസ്റ്റര്‍.
