പ്രേക്ഷകപ്രശംസ ഏറ്റുവാങ്ങി തിയറ്ററുകളിൽ മികച്ച പ്രകടനവുമായി മമ്മൂട്ടി നായകനായി എത്തിയ ക്രിസ്റ്റഫർ മുന്നേറുകയാണ്. പെൺമക്കളുടെ സ്വന്തം രക്ഷകൻ എന്നാണ് ക്രിസ്റ്റഫർ വാഴ്ത്തിപ്പെടുന്നത്. അതേസമയം, ക്രിസ്റ്റഫർ എന്ന സിനിമ യഥാർത്ഥജീവിതത്തിൽ സംഭവിച്ച കഥയാണെന്ന് ഉയർത്തുകയാണ് സാമൂഹ്യമാധ്യമങ്ങൾ. ഹൈദരാബാദിൽ നിന്നുള്ള ഐ പി എസ് ഉദ്യോഗസ്ഥൻ വി സി സജ്ജനാറുടെ യഥാർത്ഥ ജീവിതത്തിൽ നിന്നുള്ള കഥയാണ് ക്രിസ്റ്റഫർ പറയുന്നത് എന്നാണ് സോഷ്യൽ മീ‍‍ഡിയ വാദിക്കുന്നത്. അതിന് അവർ ഉയർത്തുന്ന തെളിവ് സംവിധായകൻ ബി ഉണ്ണിക്കൃഷ്ണനും സജ്ജനാറും ഒന്നിച്ചു നിൽക്കുന്ന ചിത്രമാണ്. പൊലീസ് ‘വിജിലന്റിസം’ പ്രമേയമാകുന്ന ‘ക്രിസ്റ്റഫർ’ ഈ രീതിയിലുള്ള വിവിധ വഴികളിലെ ചർച്ചകൾക്കാണ് തുടക്കം കുറിക്കുന്നത്. ചിത്രത്തിൽ മമ്മൂട്ടിയുടെ നായികയായി എത്തുന്ന സ്‌നേഹ അവതരിപ്പിച്ച കഥാപാത്രം പറയുന്നതു പോലെ നിയമവിരുദ്ധമായ നരഹത്യയെ ഇങ്ങനെ സെലിബ്രെറ്റ് ചെയ്യുന്നത് അപകടം തന്നെയാണ്. പക്ഷെ, നീതിയുടെ കാലതാമസം മനസാക്ഷിയുള്ള മനുഷ്യരെ, ക്രിസ്‌റ്റഫറിന് കയ്യടിക്കാൻ പ്രേരിപ്പിക്കും.
ഇതിനിടയിലാണ് മറ്റൊരുകാര്യം കൂടി സമൂഹ മാധ്യമങ്ങൾ ചൂണ്ടികാണിക്കുന്നത്. 2019 നവംബര്‍ 28ന് ഹൈദരാബാദിൽ യുവഡോക്‌ടറെ അതിക്രൂരമായ ബലാൽസംഗത്തിന് ഇരയാക്കിയ ശേഷം, മൃതദേഹം കത്തിച്ചുകളഞ്ഞ നിലയില്‍ കണ്ടെത്തിയിരുന്നു. ഈ കേസിലെ നാലു പ്രതികളെ പോലീസ് ആത്‌മ രക്ഷക്കായി വെടിവച്ചു കൊന്നതായി 2019 ഡിസംബർ 6ന് ഹൈദരാബാദ് ഐപിഎസ്‌ ഉദ്യോഗസ്‌ഥനായ സഞ്ജനാർ പ്രഖ്യാപിച്ചിരുന്നു. 2008ൽ ഹൈദരാബാദിലെ വാറങ്കലിലെ രണ്ട് വനിതാ എഞ്ചിനീയറിംഗ് വിദ്യാർഥികളെ, പ്രണയാഭ്യർഥന നിരസിച്ചതിന് ശ്രീനിവാസന്‍ എന്നയാളും സുഹൃത്തുക്കളായ ബി സൻജയ്‌, പി ഹരികൃഷ്‌ണൻ എന്നീ മൂന്നുപേർ ചേർന്ന് ആസിഡ് ആക്രമണം നടത്തി ശരീരത്തെ ക്രൂരമായി വികൃതമാക്കിയിരുന്നു. ഈ കേസിലെ മൂന്ന് പ്രതികളെയും പിന്നീട് പൊലീസ് ആത്‌മരക്ഷാർഥം എന്നപേരിൽ വെടിവെച്ച് കൊന്നിരുന്നു. ഈ സമയത്ത് വാറങ്കൽ ജില്ലയിലെ പോലീസ് സൂപ്രണ്ടായിരുന്നു വിസി സജ്‌ജനാർ.
നിലവിൽ സൈബരാബാദ് പോലീസ് കമ്മീഷണറാണ് വിസി സജ്‌ജനാർ ഐപിഎസ്‌. ക്രിസ്‌റ്റഫറെ പോലെ സ്‌ത്രീകളുടേയും കുട്ടികളുടേയും സുരക്ഷക്കും ക്ഷേമത്തിനും ശ്രദ്ധ കേന്ദ്രീകരിക്കുന്ന പ്രവർത്തനങ്ങൾക്ക് നേതൃത്വം നൽകുന്ന വ്യക്‌തിയാണ്‌. ഇദ്ദേഹം നടത്തിയെന്ന് പറയപ്പെടുന്ന നിയമവിരുദ്ധമായ എട്ടോളം നരഹത്യകൾ സമൂഹം വലിയരീതിയിൽ സെലിബ്രെറ്റ് ചെയ്‌തിട്ടുണ്ട്‌. അതുപോലെ വിമർശിക്കപ്പെടുകയും ചെയ്‌തിട്ടുണ്ട്‌. വിസി സജ്‌ജനാർ ഐപിഎസിനൊപ്പം ‘ക്രിസ്റ്റഫർ’ സംവിധായകൻ ബി ഉണ്ണികൃഷ്‌ണൻ നിൽക്കുന്ന ചിത്രം സമൂഹ മാദ്ധ്യമങ്ങളിൽ വയറലായതോടെ ക്രിസ്റ്റഫറിന്റെ രചനയിൽ വിസി സജ്ജനാറുടെ ജീവിതകഥ സ്വാധീനം ചെലുത്തിയിട്ടുണ്ടോ എന്ന അന്വേഷണത്തിലാണ് സമൂഹമാധ്യമങ്ങൾ.
