സിനിമാപ്രേമികൾ ഏറെ പ്രതീക്ഷയോടെയും ആകാംക്ഷയോടെയും കാത്തിരുന്ന ചിത്രമായിരുന്നു ഫഹദ് ഫാസിൽ നായകനായി എത്തിയ മലയൻകുഞ്ഞ്. തിയറ്ററുകളിൽ റിലീസ് ചെയ്ത ആദ്യദിവസം തന്നെ മികച്ച പ്രതികരണമായിരുന്നു ചിത്രത്തിന് ലഭിച്ചത്. സർവൈവൽ ത്രില്ലർ ആയി എത്തിയ ചിത്രത്തിന്റെ ഏറ്റവും വലിയ ആകർഷണം എ ആർ റഹ്മാന്റെ മ്യൂസിക് ആയിരുന്നു. ചിത്രത്തിൽ ഫഹദിന്റെ പ്രകടനം ഗംഭീരമാണെന്ന് ആയിരുന്നു സിനിമ കണ്ടവർ ഒറ്റ സ്വരത്തിൽ അഭിപ്രായപ്പെട്ടത്. മണ്ണിനടിയിൽപ്പെട്ട് പോകുമ്പോഴുള്ള ഭീകരതയെല്ലാം അദ്ദേഹം അതിഗംഭീരമായി അഭിനയിച്ചു ഫലിപ്പിക്കുകയും ചെയ്തിരുന്നു.
അതേസമയം സിനിമ റിലീസ് ചെയ്യുന്നതിന് മുമ്പു തന്നെ സിനിമയുടെ ബിഹൈൻഡ് ദ സീൻസ് വീഡിയോ പുറത്തുവിട്ടതാണ് പ്രേക്ഷകരെ അതൃപ്തരാക്കിയിരിക്കുന്നത്. സിനിമ കാണുന്നതിന് മുമ്പ് തന്നെ ബിഹൈൻഡ് ദ സീൻസ് വീഡിയോ പുറത്ത് വിട്ടതാണ് ആരാധകരെ അസ്വസ്ഥരാക്കിയത്. സിനിമ കാണുന്നതിന് മുമ്പ് തന്നെ ബിഹൈൻഡ് ദ സീൻസ് വീഡിയോ കണ്ടു പോയതിനാൽ ചിത്രത്തിന്റെ ഇമോഷനുമായി കണക്റ്റ് ചെയ്യാൻ സാധിച്ചില്ലെന്നാണ് പല പ്രേക്ഷകരും അഭിപ്രായപ്പെട്ടത്.
ചിത്രത്തിൽ കാണിക്കുന്ന മണ്ണിടിച്ചിലിനായി ഉപയോഗിച്ച സെറ്റിലെ വീഡിയോ ആണ് പുറത്ത് വിട്ടിരുന്നത്. കൃത്രിമമായി നിര്‍മിച്ച കല്ലും പാറയും വാഹനങ്ങളും മൃഗങ്ങളും ഒപ്പം ഫഹദ് ഇതിനിടക്ക് അഭിനയിക്കുന്നതിന്റെയും വീഡിയോ ആണ് പുറത്ത് വന്നത്. ഈ വീഡിയോ പുറത്ത് വന്നതിന് പിന്നാലെ ചിത്രത്തിന് വന്‍ ഹൈപ്പ് ലഭിക്കുകയും ചെയ്തു. എന്നാൽ, അണിയറയിലെ കാഴ്ചകൾ ആദ്യം കണ്ടത് തിയറ്ററിലെ കാഴ്ചയുടെ തീവ്രത കുറച്ചു. ബി ടി എസ് വീഡിയോ കണ്ടതിനാൽ സിനിമയിലെ രംഗങ്ങൾ കാണുമ്പോൾ ഇതെല്ലാം കൃത്രിമമാണല്ലോ എന്ന ചിന്തയാണ് വന്നതെന്നും സങ്കടമോ ദുഃഖമോ ഒന്നും തോന്നിയില്ലെന്നും സിനിമ കണ്ട മിക്കവരും പറഞ്ഞു. പ്രൊമോഷന്റെ ഭാഗമായി നല്‍കിയ അഭിമുഖങ്ങളിൽ ചിലതിൽ ഫഹദ് കഥയുടെ 70 ശതമാനവും വെളിപ്പെടുത്തിയതും രംഗങ്ങൾ എങ്ങനെ ആയിരിക്കുമെന്ന് പ്രവചിക്കാൻ വഴി തുറന്നെന്നും പ്രേക്ഷകർ പറഞ്ഞു.
