ചേട്ടൻ തുടക്കമിട്ടത് ലാലേട്ടന്റെ ചെറുപ്പമഭിനയിച്ച്; ഇപ്പോഴിതാ അനിയനും തുടക്കമിട്ടത് ലാലേട്ടനൊപ്പം

ടി എസ് മോഹൻ സംവിധാനം നിർവഹിച്ച് 1986ൽ പുറത്തിറങ്ങിയ ചിത്രമാണ് ‘പടയണി’. മമ്മൂട്ടി, മോഹൻലാൽ, ദേവൻ എന്നിങ്ങനെ വമ്പൻ താരനിരയുമായി എത്തിയ ചിത്രത്തിന്റെ നിർമാണം നടൻ സുകുമാരൻ ആയിരുന്നു. ആ ചിത്രത്തിലൂടെ തന്നെയാണ് ഇന്ദ്രജിത്ത് സുകുമാരന്റെ അഭിനയരംഗത്തേക്കുള്ള അരങ്ങേറ്റം. അതും ലാലേട്ടന്റെ ചെറുപ്പകാലം അഭിനയിച്ച്…!

മൂന്ന് ദശാബ്ദങ്ങൾക്ക് ഇപ്പുറം അനിയൻ പൃഥ്വിരാജ് സംവിധായകനായി അരങ്ങേറ്റം കുറിച്ചപ്പോഴും നായകൻ മോഹൻലാൽ തന്നെയാണ്. ലാലേട്ടനെ നായകനാക്കി പൃഥ്വിരാജ് സംവിധാന രംഗത്തേക്കുള്ള തന്റെ അരങ്ങേറ്റം കുറിച്ച ലൂസിഫർ മലയാള സിനിമ തന്നെ കണ്ട എക്കാലത്തേയും വലിയ വിജയത്തിലേക്കാണ് കുതിക്കുന്നത്. നിലക്കാത്ത ഹൗസ്‌ഫുൾ ഷോകളും സ്‌പെഷ്യൽ ഷോകളുയുമായി ഇൻഡസ്ട്രിയൽ ഹിറ്റിലേക്കുള്ള വമ്പൻ കുതിപ്പിലേക്കാണ് ലൂസിഫറിന്റെ മുന്നേറ്റം. ഗോവർദ്ധൻ എന്ന ശക്തമായൊരു കഥാപാത്രത്തെ ഇന്ദ്രജിത്തും ഈ സിനിമയിൽ അവതരിപ്പിക്കുണ്ടെന്നതാണ് മറ്റൊരു പ്രത്യേകത.

2002ൽ രഞ്ജിത്ത് ഒരുക്കിയ നന്ദനത്തിലൂടെയാണ് പൃഥ്വിരാജ് തന്റെ അഭിനയരംഗത്തേക്കുള്ള അരങ്ങേറ്റം കുറിച്ചത്. 2009ൽ ഇറങ്ങിയ പുതിയ മുഖമാണ് പൃഥ്വിരാജിന്റെ കരിയർ തന്നെ മാറ്റിമറിച്ച ചിത്രം. 2011ൽ ഉറുമിയിലൂടെ നിർമാണ രംഗത്തേക്ക് കടന്ന രാജു 2018ൽ പൃഥ്വിരാജ് പ്രൊഡക്ഷൻസ് എന്ന പേരിൽ സ്വതന്ത്രമായൊരു നിർമ്മാണകമ്പനിക്ക് തുടക്കം കുറിക്കുകയും ചെയ്‌തു.