കിന്നരിപ്പുഴയോരം എന്ന ചിത്രത്തിലൂടെ മലയാളത്തില്‍ എത്തിയ നടിയാണ് ദേവയാനി. ഒരുപാട് മലയാളചിത്രങ്ങളില്‍ അഭിനയിച്ചിട്ടുള്ള താരം മഹാരാഷ്ട്ര സ്വദേശിയാണ്. നിരവധി നല്ല ചിത്രങ്ങളില്‍ ഭാഗമായ താരം സീരിയലുകളിലും സജീവമായിരുന്നു. തമിഴ്, തെലുങ്ക് ഭാഷകളില്‍ താരം ഇപ്പോഴും സജീവമാണ്.
ഒരുമിച്ച് ചെയ്ത ചിത്രങ്ങളിലൂടെ പ്രശസ്ത സംവിധായകനായ രാജകുമാരനുമായി ദേവയാനി സൗഹൃദത്തില്‍ ആവുകയും പ്രണയത്തെ തുടര്‍ന്ന് ഇരുവരും വിവാഹിതരാവുകയും ചെയ്തു. ഒരുപാട് പരിഹാസങ്ങള്‍ക്കും പ്രതിഷേധങ്ങള്‍ക്കും ഇരുവരും ഇരയായിരുന്നു. ഭര്‍ത്താവിന് സൗന്ദര്യം ഇല്ല എന്നായിരുന്നു പലരുടെയും ആക്ഷേപം. എന്നാല്‍ അതൊന്നും തന്നെ ദേവയാനി കണക്കിലെടുത്തിട്ടില്ല. അന്ന് അനുഭവിച്ച പരിഹാസങ്ങളെ പറ്റി ഇപ്പോള്‍ പറയുകയാണ് താരം.
സുന്ദരിയായ ദേവയാനിക്ക് എല്ലാ മേഖലയിലും കടുത്ത പരിഹാസം അനുഭവിക്കേണ്ടി വന്നു. കറുത്ത് മെലിഞ്ഞ പൊക്കം കുറഞ്ഞ യാതൊരു ഭംഗിയും ഇല്ലാത്ത പങ്കാളിയെ ആണോ പ്രണയിക്കാന്‍ കിട്ടിയത് എന്ന തരത്തിലുള്ള സംസാരങ്ങള്‍. വീട്ടുകാരുടെ ഭാഗത്തുനിന്നുപോലും ഈ ബന്ധത്തിന് കടുത്ത എതിര്‍പ്പ് നേരിടേണ്ടി വന്നു. എന്നാല്‍ സ്‌നേഹമെന്ന ഒറ്റ മാനദണ്ഡം വച്ച് മാത്രം ആണ് ദേവയാനി തന്റെ പങ്കാളിയെ അളന്നത്. ഇതുതന്നെയാണ് വീട്ടുകാരുടെയും സുഹൃത്തുക്കളുടെയും എതിര്‍പ്പുകള്‍ അവഗണിക്കാന്‍ ദേവയാനിക്ക് ശക്തിപകര്‍ന്നത്. സ്വന്തം ഇഷ്ടത്തോടെയാണ് ഇരുവരും വിവാഹം ചെയ്തത്. സന്തുഷ്ടമായ ദാമ്പത്യം വിമര്‍ശകരുടെ വായ അടപ്പിച്ചു. സൗന്ദര്യം ഇല്ലായ്മയാണ് എല്ലാവരുടെയും പ്രശ്‌നം എങ്കില്‍ തനിക്ക് അങ്ങനെ തോന്നിയിട്ടില്ലെന്ന് ദേവയാനി പറയുന്നു.
അദ്ദേഹത്തിന് സൗന്ദര്യം കുറവാണെന്ന് യാതൊരു രീതിയിലും തനിക്ക് തോന്നിയിട്ടില്ല. പുറംമോടിയില്‍ മാത്രം ആണ് സൗന്ദര്യം എന്ന് ആരാണ് പറഞ്ഞത്. മനസ്സിലാണ് ഒരാളുടെ സൗന്ദര്യം വേണ്ടത്. തന്റെ ഭര്‍ത്താവിന് അത് ആവോളമുണ്ട്. തന്നെ കൊച്ചുകുട്ടിയെപ്പോലെ പരിചരിക്കുന്ന ഒരു വ്യക്തിയാണ് അദ്ദേഹം. ഏറ്റവും മനോഹരമായ ദാമ്പത്യജീവിതം ആയാണ് താന്‍ ഇത് കണക്കാക്കുന്നതെന്നും ദേവയാനി പറയുന്നു. രണ്ടു പെണ്‍മക്കളാണ് ഇരുവര്‍ക്കും.
