തമിഴ് സൂപ്പർതാരം ധനുഷ് നായകനാകുന്ന കർണൻ ടീസർ പുറത്തിറങ്ങി. പ്രേക്ഷകർക്കിടയിൽ ഇതിനകം തന്നെ പ്രതീക്ഷ വളർത്തിയിരിക്കുന്ന ചിത്രത്തിലെ മൂന്ന് ഗാനങ്ങൾ നേരത്തെ പുറത്തിറങ്ങിയിരുന്നു. മാരി സെൽവരാജ് സംവിധാനം നിർവഹിച്ചിരിക്കുന്ന ചിത്രത്തിലെ കണ്ട വര സൊള്ളുങ്ക, തട്ടൻ തട്ടൻ, പണ്ടാരത്തി പുരാണം എന്നീ ഗാനങ്ങളാണ് പുറത്തിറങ്ങിയത്. സന്തോഷ് നാരായണനാണ് സംഗീത സംവിധാനം നിർവഹിക്കുന്നത്.
ഗ്രാമീണ പശ്ചാത്തലത്തിൽ യഥാർത്ഥ സംഭവങ്ങളെ അടിസ്ഥാനപ്പെടുത്തിയാണ് ചിത്രം ഒരുക്കിയിരിക്കുന്നത്. സംവിധായകന്റെ മുൻചിത്രമായ പരിയേറും പെരുമാൾ പോലെ മികച്ച ഒരു ചിത്രമായിരിക്കും ഇതെന്നാണ് അറിയുവാൻ കഴിയുന്നത്. മലയാളിയായ രജിഷ വിജയനാണ് ധനുഷിന്റെ നായികയായിയെത്തുന്നത്. ലാൽ, ലക്ഷ്‌മിപ്രിയ ചന്ദ്രമൗലി, അഴഗർ പെരുമാൾ, നടരാജൻ സുബ്രഹ്മണ്യൻ, 96 ഫെയിം ഗൗരി കിഷൻ, യോഗി ബാബു എന്നിവരും ചിത്രത്തിൽ അഭിനയിക്കുന്നുണ്ട്. വി ക്രിയേഷൻസിന്റെ ബാനറിൽ കലൈപുള്ളി എസ് താനുവാണ് നിർമാണം. ഏപ്രിൽ ഒൻപതിനാണ് ചിത്രം തീയറ്ററുകളിൽ എത്തുന്നത്.
