കോൺഗ്രസിന്റെ മുതിർന്ന നേതാവും വയനാട് എം പിയുമായ രാഹുൽ ഗാന്ധിയുടെ ഓഫീസ് എസ് എഫ് ഐ പ്രവർത്തകർ ആക്രമിച്ച സംഭവത്തിൽ പ്രതികരണവുമായി നടൻ ധർമജൻ ബോൾഗാട്ടി. ഭാവിയിൽ പ്രധാനമന്ത്രി വരെയാകേണ്ട നേതാവിന്റെ ഓഫീസ് തല്ലിപ്പൊളിക്കുക എന്നുവെച്ചാൽ സാധാരണക്കാരന്റെ അവസ്ഥ എന്താകുമെന്ന് ധർമജൻ ചോദിച്ചു. ട്വന്റിഫോർ ന്യൂസ് ഡോട്ട് കോമിനോട് ആയിരുന്നു ധർമജന്റെ പ്രതികരണം. ബഫർ സോൺ വിഷയത്തിൽ അദ്ദേഹം പ്രതികരണം നടത്തുമെന്നും ധർമജൻ പറഞ്ഞു.
രാജ്യത്തെ ഏറ്റവും പ്രധാനപ്പെട്ട നേതാവാണ്. ഭാവിയിൽ പ്രധാനമന്ത്രി വരെയാകേണ്ട വ്യക്തിയാണ്. മുൻ പ്രധാനമന്ത്രിയുടെ മകനും കൊച്ചുമകനും ഒക്കെയാണ്. അങ്ങനെയൊരു നേതാവിന്റെ ഓഫീസ് തല്ലിപ്പൊളിക്കുക എന്നുവെച്ചാൽ സാധാരണക്കാരന്റെ അവസ്ഥ എന്താകുമെന്നും ധർമജൻ ചോദിച്ചു. എന്‍ഫോഴ്സ്മെന്റ് ഡയറക്ടറേറ്റ് കഴിഞ്ഞ കുറച്ച് ദിവസങ്ങളായി അദ്ദേഹത്തെ മണിക്കൂറുകളോളം ചോദ്യം ചെയ്യുകയാണ്. നിർബന്ധിച്ചും ആക്രമിച്ചും പ്രതികരണം നടത്തിക്കാൻ ആർക്കും കഴിയില്ല.
കോണ്‍ഗ്രസ് പ്രസ്ഥാനത്തിനൊപ്പം സ്‌കൂള്‍ കാലം മുതല്‍ ചേര്‍ന്ന് പ്രവര്‍ത്തിക്കുന്ന വ്യക്തിയാണ് താന്‍. കോളജ് കാലത്തും കെ എസ് യുവിന് വേണ്ടി മത്സരിച്ചിട്ടുണ്ട്, മണ്ഡലം പ്രസിഡന്റുമെല്ലാമായിരുന്നു. തെരഞ്ഞെടുപ്പില്‍ നിന്നതിന് ശേഷം സൈബര്‍ ആക്രമണം അതിരൂക്ഷമാണെന്നും ധർമജൻ പറഞ്ഞു. സാമൂഹ്യമാധ്യമങ്ങളിൽ ഇപ്പോൾ പ്രതികരണമൊന്നും നടത്താറില്ലെന്നും അതിഭയങ്കരമായ സൈബർ ആക്രമണമാണെന്നും ഒരു ഫോട്ടോ പോലും ഇടാറില്ലെന്നും ധർമജൻ പറഞ്ഞു.
