പ്രേക്ഷകരുടെ വളരെ പ്രിയപ്പെട്ട സംവിധായകനും നടനുമാണ് ദിലീഷ് പോത്തൻ. സിനിമാപ്രേമികൾക്ക് വളരെ സന്തോഷവും ആവേശവും പകരുന്ന ഒരു വിശേഷമാണ് ദിലീഷ് പോത്തൻ ഇപ്പോൾ പങ്കു വെച്ചിരിക്കുന്നത്. മമ്മൂട്ടിയുമായി ചേർന്ന് ദിലീഷ് പോത്തന്റെ പുതിയ സിനിമ വരാൻ പോകുന്നു എന്നാണ് റിപ്പോർട്ടുകൾ. ദിലീഷ് പോത്തൻ തന്നെയാണ് ഇക്കാര്യം അറിയിച്ചത്.
മമ്മൂട്ടിയുമായിചില ആശയങ്ങൾ പങ്കു വെച്ചിട്ടുണ്ടെന്ന് വ്യക്തമാക്കിയ ദിലീഷ് പോത്തൻ സ്ക്രിപ്റ്റിംഗ് സംബന്ധമായ കാര്യങ്ങളിലേക്ക് കടന്നിട്ടില്ലെന്നും വ്യക്തമാക്കി. ഇന്ത്യൻ എക്സപ്രസിനോട് സംസാരിക്കവെ ആയിരുന്നു ദിലീഷ് പോത്തൻ ഇങ്ങനെ പറഞ്ഞത്. നേരത്തെ മമ്മൂട്ടിയും ദിലീഷ് പോത്തനും ഒന്നിക്കുന്നുവെന്ന തരത്തിൽ വാർത്തകൾ വന്നിരുന്നു. “ഞാൻ മമ്മുക്കയുമായി കുറച്ച് ഐഡിയകൾ കൈമാറിയിട്ടുണ്ട്. അതുകൊണ്ട് ഇപ്പോൾ ചർച്ചകൾ നടക്കുകയാണെന്ന് പറയാം. എന്നാലും, ഞങ്ങൾ ഇതുവരെ ഒരു ദൃഢമായ പ്ലാൻ വികസിപ്പിച്ചിട്ടില്ല അല്ലെങ്കിൽ സ്ക്രിപ്റ്റ് എഴുതിയിട്ടില്ല”, എന്നാണ് ദിലീഷ് പോത്തൻ പറഞ്ഞത്.
നിലവിൽ, ബസൂക്ക എന്ന ചിത്രത്തിലാണ് മമ്മൂട്ടി നിലവില് അഭിനയിച്ചു കൊണ്ടിരുന്നത്. ഡിനോ ഡെന്നിസാണ് ചിത്രത്തിന്റെ സംവിധാനം. അദ്ദേഹം തന്നെയാണ് തിരക്കഥയും. മമ്മൂട്ടിക്കൊപ്പം ഗൗതം വാസുദേവ് മേനോൻ ആദ്യമായി വേഷമിടുന്നു എന്ന പ്രത്യേകതയും ഈ ചിത്രത്തിനുണ്ട്. ഷൈൻ ടോം ചാക്കോ, സണ്ണി വെയ്ൻ, ജഗദീഷ്, ഷറഫുദ്ദിൻ, സിദ്ധാർത്ഥ് ഭരതൻ, ഡീൻ ഡെന്നിസ്, സ്ഫടികം ജോർജ്, ദിവ്യാ പിള്ള എന്നിവരും പ്രധാന വേഷങ്ങളില് എത്തുന്നു. ഒ ബേബി എന്ന ചിത്രമാണ് ദിലീഷ് പോത്തന്റേതായി ഏറ്റവും ഒടുവില് റിലീസ് ചെയ്തത്. അതേസമയം, മോഹൻലാലിന് ഒപ്പവും ഒരു സിനിമ ചെയ്യണമെന്ന് തനിക്ക് ആഗ്രഹമുള്ളതായി ദിലീഷ് പോത്തൻ വ്യക്തമാക്കി.