ഇനി താറാവ് മേടിക്കാൻ പുറത്തിറങ്ങില്ലെന്ന് പറഞ്ഞ ടീമാണ്..! അടുത്ത പടത്തിൽ നായകനും സംവിധായകനും ‘ജോയ്‌സൺ’ തന്നെ..!

നന്നായിട്ട് ക്രിക്കറ്റ് കളിക്കുന്ന, ഞാൻ പണിക്ക് പോകൂല്ലടാ നാട്ടുകാർ തെണ്ടികളെ എന്ന് സധൈര്യം പറഞ്ഞ, ഇനി ജീവിതത്തിൽ താറാവ് മേടിക്കാൻ പുറത്തിറങ്ങില്ലെന്ന് പറഞ്ഞ ജെയ്‌സന്റെ ചേട്ടൻ ജോയ്‌സൺ പ്രേക്ഷകരെ ചെറുതായിട്ടൊന്നുമല്ല തണ്ണീർ മത്തൻ ദിനങ്ങളിൽ പൊട്ടിച്ചിരിപ്പിച്ചത്. സൂപ്പർ ഹിറ്റായ തണ്ണീർ മത്തൻ ദിനങ്ങളുടെ തിരക്കഥ ഒരുക്കുന്നതിൽ പങ്കാളിയായിരുന്ന ഡിനോയ് പൗലോസാണ് തണ്ണീർ മത്തൻ ദിനങ്ങൾക്ക് ശേഷം പ്ലാൻ ജെ സിനിമാസ് അവതരിപ്പിക്കുന്ന ചിത്രത്തിൽ നായകനും സംവിധായകനും ആകുന്നത്. പ്ലാൻ ജെ സിനിമാസിന്റെ ബാനറിൽ ജോമോൻ ടി ജോൺ ഷമീർ മുഹമ്മദ് എന്നിവർ നിർമിക്കുന്ന പുതിയ ചിത്രത്തിന്റെ രചനയും നിർവഹിച്ചിരിക്കുന്നത് ഡിനോയ് തന്നെയാണ്. ജോമോൻ ടി ജോൺ ക്യാമറ ഒരുക്കുന്ന ചിത്രത്തിന്റെ എഡിറ്റിങ് ഷമീർ മുഹമ്മദ്‌ നിർവഹിക്കുന്നു. ജാതിക്കാ തോട്ടം എന്ന സൂപ്പർ ഹിറ്റ്‌ ഗാനമൊരുക്കിയ ജസ്റ്റിൻ തന്നെ ആണ് പുതിയ ചിത്രത്തിലും സംഗീതം ഒരുക്കുന്നത്. വലിയ ക്യാൻവാസിൽ ഒരുങ്ങുന്ന ചിത്രത്തിൽ മലയാളത്തിലെ ഒരു പ്രമുഖ നായിക ആണ് മറ്റൊരു കേന്ദ്ര കഥാപാത്രത്തെ അവതരിപ്പിക്കുന്നത്.