‘ഇലാമാ പഴത്തിന്റെ കുരു കലക്കി കൊടുത്തു നോക്കാം, കണ്ണ് തുറന്നാലോ’; ജൂറിയെ വിമര്‍ശിച്ച് അല്‍ഫോണ്‍സ് പുത്രന്‍; പിന്നാലെ പോസ്റ്റ് മുക്കി

സംസ്ഥാന ചലച്ചിത്ര അവാര്‍ഡില്‍ ‘ഹോം’ സിനിമയെ തഴഞ്ഞതുമായി ബന്ധപ്പെട്ട് വിവാദം തുടരുകയാണ്. നടപടിയെ വിമര്‍ശിച്ചും അനുകൂലിച്ചും നിരവധി പേരാണ് രംഗത്തെത്തിയത്. ഇപ്പോഴിതാ ഇതുമായി ബന്ധപ്പെട്ട് പ്രതികരിച്ചിരിക്കുകയാണ് സംവിധായകന്‍ അല്‍ഫോണ്‍സ് പുത്രന്‍. ഫേസ്ബുക്കില്‍ പോസ്റ്റിട്ട ശേഷം അല്‍ഫോണ്‍സ് പുത്രന്‍ അത് പിന്‍വലിച്ചു.

ആറ് ജോലി ചെയ്തിട്ടും താന്‍ ഉഴപ്പനാണെന്ന് പറഞ്ഞ് പ്രേമം ടീമില്‍ ആര്‍ക്കും അവാര്‍ഡ് ലഭിച്ചില്ലെന്നും ഒരു പ്രത്യേക തരം വിലയിരുത്തലാണ് അവരുടേതെന്നുമായിരുന്നു അല്‍ഫോണ്‍സ് പുത്രന്റെ പ്രതികരണം. ‘ഗുരു’ സിനിമയിലെ ഇലാമാ പഴം കിട്ടുവോന്ന് നോക്കാം. ഇലാമാ പഴത്തിന്റെ കുരു കലക്കി കൊടുത്തു നോക്കാം. ഒരു പക്ഷെ കണ്ണ് തുറന്നാലോ എന്നും അല്‍ഫോണ്‍സ് പുത്രന്‍ ചോദിച്ചു. പോസ്റ്റിട്ട് മിനിട്ടുകള്‍ക്കുള്ളില്‍ അല്‍ഫോണ്‍സ് പുത്രന്‍ അത് പിന്‍വലിക്കുകയും ചെയ്തു.

അതേസമയം ഇന്ദ്രന്‍സിന് അവാര്‍ഡ് ലഭിക്കാത്തതില്‍ പ്രതിഷേധവും ചര്‍ച്ചയും ചൂട് പിടിക്കുകയാണ്. ഹോം സിനിമയെ തഴഞ്ഞ് ജൂറി തീരുമാനത്തിനെതിരെ ഇന്ദ്രന്‍സും സംവിധായകന്‍ റോജിന്‍ തോമസും രംഗത്തെത്തി. ജൂറി ഒരുപക്ഷേ ഹോം സിനിമ കണ്ടിട്ടുണ്ടാകില്ലെന്നാണ് ഇന്ദ്രന്‍സ് പ്രതികരിച്ചത്. ജനങ്ങളില്‍ നിന്നുള്ള പ്രതികരണമാണ് ഏറ്റവും വലിയ ്‌വാര്‍ഡെന്നും അത് ലഭിച്ചു എന്നുമാണ് റോജിന്‍ തോമസ് പറഞ്ഞത്.