വി.സി അഭിലാഷ് സംവിധാനം ചെയ്ത സബാഷ് ചന്ദ്രബോസ് എന്ന ചിത്രത്തെ പുകഴ്ത്തി സംവിധായകനും ഛായാഗ്രാഹകനുമായ ജിബു ജേക്കബ്. ചിത്രം ഒറ്റവാക്കില്‍ മികച്ചതെന്ന് പറയാമെന്ന് ജിബു ജേക്കബ് പറഞ്ഞു. അതിനുള്ള കാരണങ്ങളും അദ്ദേഹം വ്യക്തമായി പറയുന്നുണ്ട്.
തെക്കന്‍ ഭാഷ ഒരിക്കലും വഴങ്ങില്ലെന്നു ചിലപ്പോഴെങ്കിലും തോന്നിയേക്കാവുന്ന വിഷ്ണു ഉണ്ണികൃഷ്ണനും, ജോണി ആന്റണിയും, ഇര്‍ഷാതും, മരണവീട്ടിലെ വൃദ്ധന്‍ വരെ നെടുമങ്ങാട്ട് ഗ്രാമത്തിലെ അന്തേവാസികളായി മാറിയെന്ന് ജിബു ജേക്കബ് പറഞ്ഞു. സംഗീതം സിനിമക്ക് മുകളിലോ സിനിമ അതിലെ സംഗീതത്തിന് മുകളിലോ മുഴച്ചു നില്‍ക്കാത്തതാണ് ഒരു സിനിമാസംഗീതത്തിന്റെ മികവ്. മുന്‍പ് അത് തെളിയിച്ചിട്ടുള്ള സംഗീതസംവിധായകനാണ് ശ്രീനാഥ് ശിവശങ്കരന്‍. ചില സീനുകളില്‍ കാണുന്ന നിശബ്ദത പോലും സംഗീതമായി അനുഭവപ്പെട്ടു. ഇത്തരത്തിലുള്ള ഒരു കാലഘട്ടത്തിന്റെ കഥ പറയുമ്പോള്‍ പുലര്‍ത്തേണ്ട ദൃശ്യനീതിയും, വെല്ലുവിളിയും സജിത് പുരുഷന്‍ ഭദ്രമായ് കൈകാര്യം ചെയ്തിട്ടുണ്ട്. 1986 ലെ നെടുമങ്ങാട് സൃഷ്ടിച്ച സാബു റാം എന്ന കലാ സംവിധായനും മികച്ചു നിന്നുവെന്നും ജിബു ജേക്കബ് കൂട്ടിച്ചേര്‍ത്തു.
ഫേസ്ബുക്ക് പോസ്റ്റിന്റെ പൂര്‍ണരൂപം
198090 കളില്‍ ബാല്യമുള്ളവര്‍ക്ക് ഓര്‍മ്മയിലുണ്ടാകും നാട്ടിന്‍ പുറത്തെ ഏതെങ്കിലുമൊരു വീട്ടില്‍, ഒരു കടമുറിയില്‍ ഒന്നിച്ചിരുന്നു ടി. വി കണ്ട് ഒരുമിച്ചു ചിരിച്ച് ഒരുമിച്ചു കണ്ണുനിറച്ച കാലം..ഇന്നലെയാണ് ‘സബാഷ് ചന്ദ്രബോസ് ‘എന്ന സിനിമ കണ്ടത്. ഒറ്റവാക്കില്‍ മികച്ചത് എന്ന് പറയുന്നത്,കേട്ടു പരിചയിച്ച സ്തുതിവാചകമാകും എന്നതുകൊണ്ട് തന്നെ എന്തുകൊണ്ട് മികച്ചത് എന്ന് പറയുന്നതാണ് നല്ലത്. സിനിമയുടെ പ്രമേയങ്ങള്‍ എല്ലാകാലത്തും ഏറിയപങ്കും കെട്ടുകഥകളുടെ ആവര്‍ത്തനങ്ങളാണ്.,ഒരു നല്ല പ്ലോട്ട് തിരഞ്ഞെടുക്കുമ്പോള്‍ തന്നെ ഒരു പരിധിവരെ സിനിമ ആ തിരഞ്ഞെടുപ്പിന്റെ വ്യത്യസ്ഥതയില്‍ മികവിലേക്ക് കടന്നിരിക്കും….
വി. സി അഭിലാഷ് അത്തരത്തില്‍ തെളിയിക്കപെട്ടിട്ടുള്ള സംവിധായകനാണ്.1986 ലെ നെടുമങ്ങാട് ഗ്രാമത്തില്‍ ഇന്നലെ രാത്രിയാണ് യാദൃച്ഛികമായി എത്തപെട്ടത്. തെക്കന്‍ ഭാഷ സരസമായ പ്രയോഗത്തിലൂടെ ചിലര്‍ അഴിഞ്ഞാടുന്നത് കണ്ടപ്പോള്‍ കൗതുകം തോന്നി. ഒരിക്കലും വഴങ്ങില്ലെന്നു ചിലപ്പോഴെങ്കിലും തോന്നിയേക്കാവുന്ന വിഷ്ണു ഉണ്ണികൃഷ്ണനും, ജോണി ആന്റണിയും, ഇര്‍ഷാതും, മരണവീട്ടിലെ വൃദ്ധന്‍ വരെ നെടുമങ്ങാട്ട് ഗ്രാമത്തിലെ അന്തേവാസികളായി. കൈ വിരല്‍ ചപ്പി മരണവീട്ടില്‍ ടി. വി വച്ചുകൊണ്ട് കോളിളക്കം സൃഷ്ടിച്ച ചേച്ചിയുടെ മകന്‍ എരിയുന്ന ജാതിയതയുടെ തുറന്നുപറച്ചിലിനു കാരണക്കാരനായി.
സംഗീതം സിനിമക്ക് മുകളിലോ സിനിമ അതിലെ സംഗീതത്തിന് മുകളിലോ മുഴച്ചു നില്‍ക്കാത്തതാണ് ഒരു സിനിമാസംഗീതത്തിന്റെ മികവ് എന്ന് ഞാന്‍ വിശ്വസിക്കുന്നു. മുന്‍പ് അത് തെളിയിച്ചിട്ടുള്ള സംഗീതസംവിധായകനാണ് ശ്രീനാഥ് ശിവശങ്കരന്‍. ചില സീനുകളില്‍ കാണുന്ന നിശബ്ദത പോലും സംഗീതമായി അനുഭവപ്പെട്ടു. ഞാന്‍ ക്യാമറമാന്‍കൂടി ആയിരുന്നത് കൊണ്ട് ഇത്തരത്തിലുള്ള ഒരു കാലഘട്ടത്തിന്റെ കഥ പറയുമ്പോള്‍ പുലര്‍ത്തേണ്ട ദൃശ്യനീതിയും, വെല്ലുവിളിയും സജിത് പുരുഷന്‍ ഭദ്രമായ് കൈകാര്യം ചെയ്തിട്ടുണ്ടെന്നു തോന്നി . 1986 ലെ നെടുമങ്ങാട് സൃഷ്ടിച്ച സാബു റാം എന്ന കലാ സംവിധായകനേയും വിസ്മരിച്ചുകൂടാ എന്തായാലും നല്ല സിനിമ കണ്ട മനസ്സുമയാണ് ഈ എഴുത്ത്. നിര്‍മ്മാതാവിനും, അണിയറപ്രവര്‍ത്തകര്‍ക്കും ഹൃദയം നിറഞ്ഞ ആശംസകള്‍.
