ജയസൂര്യയെ നായകനാക്കി സംവിധായകൻ നാദിർഷ ഒരുക്കിയ ചിത്രമായിരുന്നു ഈശോ. ഒടിടിയിൽ റിലീസ് ചെയ്ത ചിത്രം ഒക്ടോബർ അഞ്ചു മുതൽ സോണി ലിവിൽ പ്രദർശനം ആരംഭിച്ചു. ചിത്രത്തിന് മികച്ച പ്രതികരണമാണ് ലഭിച്ചു കൊണ്ടിരിക്കുന്നത്. ഈശോയിൽ നടൻ ഇന്ദ്രൻസും അഭിനയിക്കുന്നുണ്ട്. എന്നാൽ, ഇന്ദ്രൻസിന്റെ കഥാപാത്രം ഏതെങ്കിലും ജൂനിയർ ആർട്ടിസ്റ്റ് ചെയ്യേണ്ടതാണെന്നും അത്ര ചെറിയ കഥാപാത്രമാണെന്നും ചില സിനിമ ഗ്രൂപ്പുകളിൽ ചർച്ച വന്നിരുന്നു. സിനിഫെൽ ഗ്രൂപ്പിൽ ഇത്തരത്തിൽ പരാതി ഉന്നയിച്ച ആൾക്ക് കമന്റ് ബോക്സിൽ മറുപടി നൽകിയിരിക്കുകയാണ് സംവിധായകൻ നാദിർഷ.
‘പ്രിയപ്പെട്ട നാദിക്കാ… ഈശോ സിനിമ കണ്ടു. സിനിമ ഇഷ്ടമായിപക്ഷേ ഇന്ദ്രൻസ് ചേട്ടൻ… മലയാളികൾ ഒരേ സ്വരത്തിൽ എതിരഭിപ്രായമില്ലാതെ അംഗീകരിക്കുന്ന കലാകാരൻ. കോമഡിയിലൂടെ വന്നു വില്ലനായും നായകനായും സ്വഭാവനടനായും നമ്മുടെ മനസ്സിലേക്ക് കുടിയേറിയ കലാകാരൻ. രണ്ട് തവണ സംസ്ഥാന പുരസ്‌കാരം നേടിയ നടൻ… Shanghai international film festival ൽ മികച്ച സിനിമയായി തിരഞ്ഞെടുക്കപ്പെട്ട സിനിമയിൽ പ്രധാനവേഷം ചെയ്ത നടൻ. എളിമയുടെ അങ്ങേ അറ്റമാണ് ഇന്ദ്രൻസ് ചേട്ടൻ. ഇന്ന് ആദ്യ സിനിമ ഹിറ്റ്‌ ആവുമ്പോഴേക്കും വീട്ടിൽ നിന്ന് ലൊക്കേഷനിലേക്ക് കാർ വേണം എന്ന് നിർബന്ധം പിടിക്കുന്ന ആർട്ടിസ്റ്റുകൾ ഉള്ള കാലത്ത് കാർ അറേഞ്ച് ചെയ്യാമെന്ന് പറഞ്ഞാലും ട്രെയിൻ മതി എന്ന് പറയുന്ന, 1st AC ബുക്ക്‌ ചെയ്യാം എന്ന് പറയുമ്പോൾ സ്ലീപ്പർക്ലാസ് മതി എന്ന് പറയുന്ന( പേർസണൽ അനുഭവം )അത്രയും down to earth ആയ മനുഷ്യനാണെന്ന് കരുതി ഒരു ജൂനിയർ ആർട്ടിസ്റ്റിനെ വെച്ച് ചെയ്യേണ്ട ഒരു സീനിൽ അദ്ദേഹത്തെപ്പോലൊരു നടനെ കൊണ്ട് അഭിനയിപ്പിച്ചത് എന്തിനാണ് നദിർഷാ ഭായ്? ഏത് ചെറിയ വേഷം കൊടുത്താലും അദ്ദേഹം ചെയ്യും. ഒരു പക്ഷേ നിങ്ങൾ തമ്മിലുള്ള ബന്ധം അങ്ങനെയായത് കൊണ്ടാവാം. എന്നാലും ഇത് മോശമായിപ്പോയി നാദിക്കാ. സത്യത്തിൽ നിങ്ങൾ ഇന്ദ്രൻസ് ചേട്ടനെ വിലകുറച്ച് കണ്ടതായാണ് എനിക്ക് feel ചെയ്തത്. അല്പം പ്രാധാന്യമുള്ള ഒരു വേഷം അദ്ദേഹത്തിന് നൽകിയിരുന്നെങ്കിൽ എന്ന് തോന്നിപോയി..’ – വിഷ്ണു എന്ന വ്യക്തി നാദിർഷയെ അഭിസംബോധന ചെയ്തു കൊണ്ട് പങ്കുവെച്ച കുറിപ്പാണ് ഇത്.
ഇതിനാണ് കമന്റ് ബോക്സിൽ നാദിർഷ മറുപടി നൽകിയത്. മറുപടി ഇങ്ങനെ, ‘ബ്രദർ, ഇന്ദ്രൻസ് ചേട്ടനും ഞാനും തമ്മിലുള്ള ബന്ധം മാനത്തെ കൊട്ടാരം മുതൽ തുടങ്ങിയതാണ്. എന്റെ സ്വന്തം സഹോദരന്റെ സ്ഥാനമാണ് അദ്ദേഹത്തിന്. ഞാൻ ഇതിന് മുമ്പ് ചെയ്ത പല ചിത്രങ്ങളിലും പ്രധാന വേഷങ്ങളിൽ വിളിച്ചിട്ട് അദ്ദേഹത്തിന് വരാൻ സാധിച്ചില്ല അതുകൊണ്ട് ഈ ചിത്രത്തിലെ അദ്ദേഹത്തിൻ്റെ കഥാപാത്രത്തെക്കുറിച്ച് കൃത്യമായ ധാരണയോടെയാണ് ചേട്ടൻ വന്ന് അഭിനയിച്ചത്. അത് റോളിൻറെ നീളം നോക്കിയല്ല ബന്ധങ്ങളുടെ ആഴം കൊണ്ട് വന്നതാണ്.’ – നാദിർഷയുടെ മറുപടിക്ക് നിരവധി പേരാണ് ലൈക്ക് രേഖപ്പെടുത്തിയത്.
