സംവിധായകൻ പ്രിയദർശനെ ഡോക്ടറേറ്റ് നൽകി ആദരിച്ചു. ചെന്നൈയിലെ ഹിന്ദുസ്ഥാൻ ഇൻസ്റ്റിറ്റ്യൂട് ഓഫ് സയൻസ് ആൻഡ് ടെക്നോളജിയാണ് പ്രിയദർശന് ഡോക്ടറേറ്റ് നൽകിയത്. ഇന്ത്യൻ സിനിമാ രംഗത്തിന് പ്രിയദർശൻ നൽകിയ സമഗ്ര സംഭാവനകളെ മാനിച്ചാണ് ഡോക്ടറേറ്റ്. മലയാളത്തിൽ ഏറ്റവും കൂടുതൽ ചിത്രങ്ങൾ സൂപ്പർഹിറ്റാക്കിയ സംവിധായകൻ കൂടിയാണ് പ്രിയദർശൻ.
മലയാളത്തിൽ മാത്രമല്ല സംവിധായകൻ എന്ന നിലയിൽ പ്രിയദർശൻ തന്റെ കൈയൊപ്പ് പതിപ്പിച്ചിട്ടുള്ളത്. തമിഴ്, തെലുങ്കു, കന്നഡ, ഹിന്ദി ഭാഷകളിലും പ്രിയദർശൻ സിനിമകൾ സംവിധാനം ചെയ്തിട്ടുണ്ട്. ദേശീയ പുരസ്കാരം ഉൾപ്പെടെ നിരവധി പുരസ്കാരങ്ങൾ സ്വന്തമാക്കിയിട്ടുള്ള പ്രിയദർശൻ മലയാളം, കന്നഡ, തമിഴ്, തെലുങ്ക്, ഹിന്ദി ഭാഷകളിലായി നൂറിനടുത്ത് ചിത്രങ്ങൾ സംവിധാനം ചെയ്തിട്ടുണ്ട്.
മോഹൻലാലിനെ നായകനാക്കി സംവിധാനം ചെയ്ത ‘മരക്കാർ – അറബിക്കടലിന്റെ സിംഹം’ എന്ന ചിത്രമാണ് പ്രിയദർശന്റേതായി അവസാനമായി റിലീസ് ചെയ്ത ചിത്രം. ഇനി പുറത്തു വരാനുള്ളത് ഒരു തമിഴ് ചിത്രമാണെന്നാണ് റിപ്പോർട്ടുകൾ. പ്രിയദർശൻ സംവിധാനം ചെയ്ത ചിത്രം, കിലുക്കം, ചന്ദ്രലേഖ എന്നീ ചിത്രങ്ങൾ ഇൻഡസ്ട്രി ഹിറ്റുകൾ ആയിരുന്നു. ഇതു കൂടാതെ ഒട്ടേറെ ബ്ലോക്ക്ബസ്റ്റർ, സൂപ്പർ ഹിറ്റ് ചിത്രങ്ങളും അദ്ദേഹം സംവിധാനം ചെയ്തു.
