സംവിധായകൻ രാജസേനൻ പുതിയ രാഷ്ട്രീയ ചുവടുമാറ്റത്തിന് ഒരുങ്ങുന്നു. ബി ജെ പി വിട്ട് സി പി എമ്മിലേക്ക് ചേരുകയാണെന്ന് രാജസേനൻ അറിയിച്ചു. ഇത് സംബന്ധിച്ച് സി പി എം സംസ്ഥാന സെക്രട്ടറി എം വി ഗോവിന്ദനുമായി എ കെ ജി സെന്ററിൽ ചർച്ച നടത്തി. ഇന്ന് വൈകുന്നേരത്തോടെ ഇത് സംബന്ധിച്ച പ്രഖ്യാപനം ഉണ്ടാകുമെന്നാണ് പ്രതീക്ഷിക്കുന്നത്.
നേരത്തെ തെരഞ്ഞെടുപ്പിൽ ബി ജെ പിയുടെ സ്ഥാനാർത്ഥി ആയിരുന്നു രാജസേനൻ. ബി ജെ പി സംസ്ഥാന നേതൃത്വം അവഗണിച്ചെന്ന് ആരോപിച്ചാണ് പാർട്ടി വിടുന്നത്. കലാകാരൻ എന്ന നിലയിലും പാർട്ടി പ്രവർത്തകൻ എന്ന നിലയിലും പരിഗണന കിട്ടിയില്ലെന്ന് പറഞ്ഞ രാജസേനൻ ഏറ്റവുമൊടുവിൽ സിപിഎമ്മുമായി സഹകരിച്ച് പ്രവർത്തിക്കാൻ തീരുമാനം എടുക്കുകയായിരുന്നുവെന്നും ഒരു മാധ്യമത്തിനോട് സംസാരിക്കവെ പറഞ്ഞു.
കലാകാരന്മാർക്ക് കൂടുതൽ അവസരങ്ങൾ നൽകുന്ന പാർട്ടി സിപിഎമ്മാണ്. ബിജെപിയുടെ സംസ്ഥാന ഘടകത്തിൽ ഏറെ പോരായ്മകളുണ്ടെന്നും അവഗണന ആവർത്തിക്കപ്പെട്ടതോടെയാണ് രാജിയെന്നും ബി ജെ പി സംസ്ഥാന കമ്മിറ്റി അംഗത്വം ഇന്ന് രാജിവെക്കുമെന്നും രാജസേനൻ അറിയിച്ചു.
